Bul týraly quqyq buzýshylyqtyń aldyn alý jónindegi vedomstvoaralyq komıssııanyń otyrysynda Oblystyq polısııa departamentiniń bastyǵy Beket Aımaǵambetov habardar etti. Bıylǵy jyldyń basynan bergi 5 aıda oblystaǵy qylmys ótken jyldyń sáıkesti merzimimen salystyrǵanda 10 prosentke qysqarǵan. Sonymen qatar urlyqty ashý sońǵy bes jylda jaqsara túsken, al 2014-2018 jyldar aralyǵynda jalpy urlyq oblys óńirinde 15942-den 9541-ge deıin azaıǵan.
Biraq urlyqtyń aty – urlyq, ol qansha azaıǵanymen adamdar úshin zardaby aýyr. Oǵan qarsy kúres jáne profılaktıkalyq jumystar oblysta úzilissiz júrgizilip keledi. Profılaktıkalyq jumystardy jaqsartý úshin «Qazaqtelekom» AQ fılıalymen birlesip, kóp qabatty úılerge 1202 vıdeokamera ilingen. Mundaı kameralar qalaishilik avtobýstarda da ornatylǵan. Komıssııa otyrysynda oblys ákimi Arhımed Muhambetov vıdeokamera ornatylmaǵan avtobýs ıeleri memleklettik satyp alý konkýrstaryna qatystyrylmaýy kerektigin aıtty. Oblys óńirinde «damyp» turǵan urlyq túriniń biri qalta urlyǵy eken.
Otyrysta kóbirek sóz bolǵan másele mal urlyǵynyń azaımaı otyrǵanyna baılanysty boldy.
«Sharýashylyqtyń jáne jeke sektordaǵy urlanǵan maldardyń tańbalanbaýy, en salynbaýy jáne jaıylymda qaraýsyz qaldyrý ony izdestirýde qıyndyqtar ákeledi. Osy oraıda ótken jyly oblystaǵy sharýashylyq basshylary jáne turǵyndarmen 517 jıyn ótkizdik, onda 40 myńǵa jýyq adamdy qamtydyq» deıdi Beket Aımaǵambetov. Ol bıyldyń ózinde 88 mal urlyǵy faktisi tirkelgendigin aıtty.
Sıfrlandyrý jetistikteri mal urlyǵyn azaıtýǵa jáne onyń aldyn alýǵa úlken kómegin tıgizedi. Oblys óńirinde ótken jyly 24 «GPS»- treker ornatylsa, bıyl jyl basynan beri 34 «GPS»- treker ornatyldy. Sonyń arqasynda mal urlyǵy 2017 jylǵy 280-nen, ótken jyly 243 bolyp azaıǵan. Oblysta uzyn aıaqty mal 1 266 325 bolsa, sonyń 1 127 515-i, 89 prosenti tańbalanypty. Beket Aımaǵambetov komıssııa otyrysynda mal ıesi, turǵyndar jıyny jáne baqtashy arasynda kelisim shart jasaý kerektigi týraly usynys aıtty. Qalaı degenmen de maldyń qoldy bomaýyna mal ıesiniń de jaýapkershiligin arttyrý kerektigi sóz boldy.
Qostanaı
