Aıbyndy jastar – erteńgi el qorǵany

Jas órender úshin aıtýly is-shara

«Aıbyn» jıyny elimizdiń barlyq oblystary men respýblıkalyq mańyzy bar qalalarynyń jas órenderi úshin besinshi jyl qatarynan asyǵa kúte­tin aıtýly is-sharaǵa aınaldy. Bul – Qazaqstannyń Tuńǵysh Prezıdenti – Elbasy Nursultan Nazarbaevtyń bas­tamasymen óskeleń urpaqtyń boıynda patrıottyq sezimdi qalyptastyrý, olardy otansúıgishtik turǵyda tárbıeleý jáne osynaý qasıetterdi áskerı ómirdiń qyr-syrymen ushtastyrý jolyndaǵy izgi amaldardyń nátıjesi.

Elbasy ótken jyly qazan aıynda Qazaqstan halqyna arnaǵan Joldaýynda: «Boıskaýt qozǵalysy sııaqty «Sarbaz» balalar-jasóspirimder birlestigin qu­ryp, mektepterde áskerı-patrıottyq tár­bıeniń rólin kúsheıtken jón» dep, jas­tar tárbıesiniń mańyzdy baǵytyn atap kórsetken bolatyn.

Al bıyl Jastar jylynyń ashylý sal­tanatynda Nursultan Nazarbaev «Jas sarbaz» qozǵalysy negizinde áske­rı-patrıottyq tárbıe berý isin damytýdy tapsyrdy.

«Úkimetke 2025 jylǵa deıingi áskerı-patrıottyq tárbıe berý baǵdarlamasyn ázirleýdi tapsyramyn. «Jas sarbaz» bastamasynyń úlgisimen elimizdegi volonterlerdi, ásirese, áleýmettik jobalar salasyndaǵy eriktilerdi biriktirý qajet», degen edi Elbasy.

Bul tapsyrmadan soń elimizdiń bar­lyq óńirlerinde áskerı-patrıottyq jumysty jetildirý maqsatynda «Jas sarbaz» áskerı-patrıottyq qozǵalysy Qor­ǵanys mınıstrligimen jáne jergi­likti atqarýshy organdarmen yntymaq­tas­tyq, ózara is-qımyl týraly memo­ran­dýmǵa qol qoıǵannan keıin Elbasy tapsyrmasyn oryndaý sharalary qar­qyn ala tústi. Onyń ishinde Jastar jylynda «Jas sarbaz» áskerı-patrıot­tyq qozǵalysy 300-ge jýyq is-shara ótki­zip, oǵan 700 myńnan asa jasóspirim qatysqan.

Osy oraıda bolashaq Otan qorǵaý­shylardyń alǵashqy mereıtoılyq jıy­nyna arnaıy barǵan Qazaqstan Qarýly Kúshteriniń Joǵarǵy Bas qol­basshysy Qasym-Jomart Toqaev áskerı-patrıottyq jıynǵa qatysýshylardy quttyqtap, ótkizilip otyrǵan is-shara­nyń erekshe mańyzyn atap ótti. Son­daı-aq bul jıynnyń elimizdiń eń senimdi, jaýapty, otanshyl ári batyl jas­tarynyń basyn qosyp otyrǵanyn aıtty.

– Biz Táýelsiz elimizdiń aıbyndy jastaryna árqashan zor úmit artamyz, senemiz. Jaqsy dástúrge aınalǵan «Aıbyn» áskerı-patrıottyq jıyny – otanshyl jastardy adal qyzmet etýge, el qorǵany bolýǵa tárbıeleıtin biregeı alań, – dedi Memleket basshysy.

Qazaqstan Prezıdenti jastardy qoldaýǵa jáne olardyń múmkindikterin júzege asyrýyna memleket tarapynan erekshe kóńil bólinetinin atap ótip, jastar damýdyń sımvoly jáne jarqyn bolashaqqa degen úmittiń kórinisi ekenine nazar aýdardy. Sondyqtan Elbasynyń 2019 jyldy Jastar jyly dep ataǵany kezdeısoq emestigin aıtty.

– Jastar el ómirine belsendi aralasyp, azamattyq qoǵamnyń damýyna jáne elimizdi tabysty jańǵyrtýǵa septigin tıgizýde. Elimizde Qazaqstan jastarynyń boıynda otanshyldyq rýhty qalyptastyryp, tárbıeleýge aıryqsha kóńil bólinedi. Osyǵan oraı, «Jas sarbaz» respýb­lı­kalyq balalar men jasóspi­rim­derdiń áskerı-patrıottyq qoz­ǵalysy quryldy. Barlyq óńirde bul uıymnyń bólimsheleri ja­saqtalyp, jumys istep jatyr. «Jas sarbaz» áskerı-patrıottyq klýbtary men synyptarynyń sany 6 myńǵa jetip, 174 myńnan astam balany qamtydy, – dedi Qazaqstan Qarýly Kúshteriniń Joǵarǵy Bas qolbasshysy.

Memleket basshysy jasam­pazdyq, beıbitshilik pen kelisim, halyqtyń bir­ligi, Otanǵa degen súıispenshilik jáne bári­mizge ortaq taǵdyr joly syndy bizdiń halq­y­myzdy biriktiretin qundylyqtar jas­tar­dyń basty baǵdaryna aınalýy tıis dedi.

– Men júreginde otanshyldyq rýhy jalyndaǵan jastardyń jańa býyny ósip kele jatqanyn kórip otyrmyn. Búgingi urpaq­tyń oıy – ushqyr, bilimi – ozyq. Otanymyz Máńgilik el­diń bedelin arttyra berý – sen­derge artylǵan zor úmit. Son­dyq­tan jastarymyz ulttyq qun­­dy­­l­yq­tarymyzǵa adal bolyp, Qazaq­­stan­nyń jetistikterin eseleı beredi dep men kámil senemin! – dedi Qazaqstan Prezıdenti.

Qasym-Jomart Toqaev jas­tarǵa arnaǵan sózinde ár adamnyń ómirine qajetti qasıetter týraly aıtty. Mem­leket basshysynyń pikirin­she, eń aldymen, para­sattylyq, bilim, kásibılik pen Otanǵa degen adaldyq qajet.

– Sizderdiń erik-jigerlerińiz, kúsh-qýattaryńyz ben shyǵar­ma­shylyq áleýet­terińiz mol. Osy­nyń barlyǵyn ómir­degi bas­ty maqsattaryńyzdy júze­ge asyrý úshin paıdalanyńyzdar. Elimiz árqaısyńyzdyń tabys­ty bolǵandaryńyzdy qalaı­dy. Osyny esten shyǵar­ma­ńyz­dar. Sebebi sizderdiń jetis­tik­terińizden tutas eldiń jetistigi qalyptasady. Sizderdiń oı-maqsattaryńyzdyń oryndalýyna shyn júrekten tilektespin, – dedi Memleket basshysy.

Qazaqstan Qarýly Kúshteriniń Joǵar­ǵy Bas qolbasshysy sóziniń sońynda «Aıbyn» respýblıkalyq áskerı-pat­rıot­tyq jastar jıy­nyn ashyq dep ja­rııalap, qa­ty­s­ý­shylardyń oqýyna sáttilik, myqty densaý­lyq pen tabys tiledi. Qazaq­stan Prezıdentine qarý-jaraq túrleri, Qurlyq ás­ker­­leri men Áýe qorǵanys kúsh­teri teh­nı­kalarynyń múmkin­dikteri ta­nys­tyryldy. Son­daı-aq Mem­leket basshysy da­lalyq lagermen tany­syp, qatysýshylardyń ja­tyn or­nyn kórdi, áskerı-pat­rıot­tyq klýbtardyń tárbıelený­shi­lerimen áńgimelesti.

Smart úıirmeler qurylýda

Memleket basshysynyń sózi­nen keıin saltanatty jaǵdaıda «Aıbyn» týy kóterildi. Týdy kóterý­diń erekshe quqyǵy Pavlo­dar qalasyndaǵy «Qaısar» ás­kerı-patrıottyq klýbynyń kapıtany, «Aıbyn-2018» gran-prıiniń ıegeri Ashat Maqyshevqa berildi.

Budan soń «Jas sarbaz» res­pýblıka­lyq qoǵamdyq birlesti­giniń tóraǵasy, aǵa leıtenant Meıirbek Meńdiǵalıev jıynǵa qatysýshylar aldynda jarystyń ádil ótetindigin aıtyp ant berdi.

Is-shara barysynda jastardyń asyǵa kútkeni de, kóz almaı tam­a­shalaǵany da sap­taǵy sarbaz­dar­dyń kásibı-áskerı óneri bol­dy. Atap aıtqanda, Qurlyq áskerleri ás­ke­rı bólimderiniń áskerı qyzmetshileri men Áýe qorǵanysy kúshteriniń ushqysh­tar qu­ramy qarý-jaraq pen áskerı teh­nı­ka­lar­dyń múmkindikterin – artıllerııa­dan, tanki­den, armııalyq avıasııa tikushaq­tary­­nan jáne zamanaýı kóp fýnksıonal­dy Sý-30SM joıǵyshtarynan atýdy kórsetti.

Kókte jyldamdyǵy dybys­tan joǵary ushaqtar zaýlap, kóz aldarynda shartty sodyrlardy joıǵan arnaýly jasaqtyń shalt qımyly jasóspirimderdiń delebesin qozdyrǵany baıqaldy. Joıylǵan tehnıkalardan shyq­qan qara tútindi alǵash kórip, oq-dáriniń ıisi muryndaryna jetken bolashaq sarbazdar aǵalarynyń árbir sátti áreketinen soń dýyldata qol soǵyp otyrdy.

Munan soń ortaǵa qazaq batyrlaryn somdaǵan alpamsadaı jigitterdiń ulttyq soǵys ónerin kórsetken qımyldary da jıynǵa qatysýshylardy tánti etti.

Osyndaı qıqýlaǵan kórinister barysynda «Aıbyn» jıynyna qatysý­shylardy sózge tarttyq.

Mańǵystaý oblysyndaǵy Saıyn Shapa­ǵatov atyndaǵy orta mekteptiń oqý­shysy Ernar Seıtek «Aıbyn» áskerı-patrıottyq jıynyna qatysý qatarlas­tarynyń armanyna aınalǵanyn aıtady.

– Meniń qatarlastarym, synyptastarym «Aıbyn» áskerı-patrıottyq jıynyna qatysý úshin baryn salýda. Biz – Otanymyzdyń patrıotymyz. Erjetken soń jańa kóz aldymyzda ónerin kórsetken aǵalarymyz tárizdi jetistikterge jetip, elimizdiń qajetine jaraýdy armandaımyz. Jıynǵa qatysyp jatqan saı­dyń tasyn­daı iriktelgen oqýshylar ara­syn­daǵy doda qazirdiń ózinde qyza tústi. «Aı­bynǵa» mańǵystaýlyq komanda joǵa­ry daıyndyqpen keldi. О́z basym bel­temirge 25 ret tartylyp, 4 myń metr­lik qashyqtyq­ty 20 mınýtta júgirip ótip, ko­mandamnyń jeńiske jetýine úles qosa­myn dep oılaımyn, – deıdi jas sarbaz.

Al Jambyl joǵary polıteh­nıkalyq kolledjiniń oqýshysy Talshyn Baı­týrkova da Taraz qalasynan kelgen koman­daǵa júgirý saıysynda jáne avtomat­ty qarýdy bólshekteý men jınaý saıysynda qoldaý kórsetpek.

– «Aıbynǵa» qatysýǵa nıet bildirgen oqýshylar arasyn­da irikteý qatań ótti. Biz – júz­den ozǵan júırikpiz. Men bala kúnim­n­en áskerı kıim kıgen qyz­met­shilerge qyzyǵa qarap, olardyń temir­deı tártip­terine tánti bola­tynmyn. Mine, sáti túsip naǵyz áskerılerdiń ortasyna tap boldym, – deıdi qýanyshyn jasyra almaǵan Talshyn.

Qazaqstan Prezıdenti, Qarýly Kúshterdiń Joǵarǵy Bas qolbasshysy Qasym-Jomart Toqaevtyń kadr daıarlaý jáne áskerı-patrıottyq tárbıe aıasynda «Jas sarbaz» qozǵalysyna qatysýshylar arasynda, onyń ishinde mamandandyrylǵan fızıka-matematıka beıindi mektepterde smart-sarbaz úıirmelerin qurý tapsyrmasynyń alǵashqy nátıjeleri de jıyn barysynda belgili boldy. Onyń jar­qyn dáleli – «Aıbyn-2019» jıy­ny­nyń aıasynda ótkizilgen «Meniń robotym» saıysy.

Sonymen qatar bolashaq Otan qor­ǵaýshylar Aibyn talks ın­terak­tıvti kezdesýine de qatys­ty. Kezdesý barysynda olar ás­­ker túrleriniń bas qolbas­shy­­lary­­men, sportshylarmen jáne ataq­ty tulǵalarmen, onyń ishin­de Reseı­de ótken «Golos. Detı» telejo­ba­synyń jeńimpazy Er­jan Maksımmen, shahmattan álem­niń bes dúrkin chempıony Bıbisara Asaýbaevamen, mentaldy arıfmetıkadan álem chempıony Ilııas Toqtahanmen, keýdeni jerden kóterýden álem rekordsmeni Ámir Mahmetpen áńgimelesip, oılarymen bólisti.

Jalpy, áskerı-patrıot­tyq jas­­tar jıynynyń baǵdar­la­ma­syn­da áskerı-qoldanbaly baı­qaýlar, atap aıtqanda, bel­temirde tartylý, jalpy­áskerı qor­ǵanys jıyntyǵyn kııý, pnevma­tıkalyq myltyqpen oq atý, granata laq­tyrý, AK-74 avtomatyn bólshek­teý jáne jınaý, qysqa jáne alys qa­shyqtyqqa júgirý syndy er­jú­rek­terge tán saıystar engizilgen.

Jıynǵa qatysýshy jastar men jasóspirimder Memleket basshysyna oqýda, sportta joǵary jetistikterge jetýge ýáde etip, «Jas sarbaz» keýde belgi­sin maq­ta­nyshpen taǵatyndaryn aıtty.

Jıynnyń qorytyndysy al­daǵy senbi kúni shyǵarylyp, jeńim­pazdar marapattalady.