Elimizdegi birlik pen halyqtyń ózara tatýlyǵynyń mańyzdylyǵy týraly Elbasy buǵan deıin de talaı aıtqan-dy. Ásirese, qoǵam tynyshtyǵyn saqtaýda quqyq qorǵaý qurylymdarynyń aldyna júkteletin mindetter óte aýqymdy. О́ıtkeni tártip pen qaýipsizdikti qamtamasyz etip, kez kelgen quqyq buzýshylyqqa tosqaýyl bolatyn el tynyshtyǵyn qorǵaıtyn – ishki ister organdarynyń qyzmetkerleri. Elbasynyń polıseılerden tereń de sapaly ózgerister kútetini sondyqtan. Sebebi qaýipsizdik – eldegi turaqtylyqtyń ajyramas bóligi.
Adamı turǵydaǵy eń asyl maqsat – azamattar sanasynda polıseıler – jazalaýshy emes, kerisinshe, qıyn jaǵdaıda kómek kórsetýshi degen túsinikti ornyqtyrý. Iаǵnı, halyqtyń shynaıy qamqorlyqty sezine alýy. Osy qaǵıdany jadyna tý etip, el múddesi úshin ter tógip júrgen azamattarymyz aramyzda óte kóp. Boıynda ultjandylyq pen patrıottyq qasıetter birge órilip, qyzmet jolyn el aldyndaǵy boryshy sanap kele jatqan abzal azamattarymyzdyń biri – Danııarbek Musaev.
«Osy bir oıy men qyry, qyzyǵy men qıyndyǵy mol joldy ákem men aldyńǵy tolqyn aǵalarym saldy. Áke salǵan sara joldy taıǵanaqtamaı júrip ótý – bala kúngi asyl armanym bolatyn», deıdi Danııarbek О́metaıuly.
Rasynda, aq arman adastyrmady. Búginde ıyǵyna polkovnık shenin taqqan, syr men symbaty kelisken atpal azamat IIM Kóliktegi polısııa departamenti bastyǵynyń orynbasary laýazymyn atqarady.
Ol kez kelgenniń yńǵaıyna kóne bermeıtin bul mamandyqqa mektepti támamdap, áskerı boryshyn ótegennen keıin keldi. Bul bulańdaǵan balalyqtyń artta qalyp, naǵyz jigittiktiń tolysqan shaǵy ǵoı. О́ziniń aıtýynsha, bul oń-soldy tanyp, aq pen qaranyń jigin aıyryp ári ómirge salmaqpen qaraı bastaǵan kez.
«Týǵan jerge týyńdy tik», demekshi Danııarbek О́metaıuly eń alǵash eńbek jolyn ata-babasynyń qutty mekenine aınalǵan Jambyl oblysyna qarasty Jańatas qalasynyń patrýldik-bekettik qyzmetinen bastaǵan. Áskerı ómirdiń temirdeı tártibine ábden tóselgen janǵa qaı jumystyń bolsyn aýyrlyǵy joq. Onyń ústine polısııa qyzmetin bala kúninen kórip óskendikten be, oǵan tipti de tańsyq bolmady. Qıly qıyndyqtarǵa da tótep berdi. Sóıtip júrip ómirine azyq bolar úlken tájirıbe jınaqtaıdy. «Syrly aıaqtyń syry ketse de, syny ketpeıdi. – Sol kezdegi kómekshi quraldardyń qazirgi zamanaýı quraldaryndaı bolmasa da – ózimizge júktelgen tapsyrmalardy abyroımen oryndap shyǵýymyzǵa qyldaı kedergisi bolmady», deıdi polısııa polkovnıgi ótkendi eske alyp.
Qyzmettiń ystyq-sýyǵyna úırenip, qanyǵyp kele jatqan polıseı 1989 jyly KSRO IIM Almaty arnaıy mılısııa mektebine oqýǵa túsedi. Musaev oqýdy aıaqtaǵan soń da týǵan ólkesine oralyp, jedel ýákil bolyp jumysqa ornalasady. Qylmystyq izdestirý salasynda kóptegen kúrdeli isterdi júrgizdi, shynyqty, shırady. Bastaǵan isin árdaıym sońyna deıin jetkizip, sátti aıaqtaıtyn polıseı – eńbekqorlyǵynyń arqasynda jurt nazaryna birden ilikti.
Sóıtip, Danııarbek Musaev 1993 jyly qajyrly qaıratymen, tabandy eńbegimen aǵa leıtenant shenin merziminen buryn alyp, mılısııanyń úzdik jedel ýákili atanady.
2001 jyly podpolkovnık D.Musaev, 2005 jyly polkovnık ataǵyn da merziminen buryn alady. Bul da kez kelgenge buıyra bermeıtin abyroı, jetistik. Budan soń bilimin jetildirý maqsatynda H.A.Iаsaýı atyndaǵy Halyqaralyq qazaq-túrik ýnıversıtetinde oqydy, ony da sátti bitirdi. Qazirgi tańda keıipkerimiz – zań ǵylymdarynyń kandıdaty.
Buǵan deıin D.Musaev birneshe jyl Almaty qalasyndaǵy Kóliktegi Ońtústik-Shyǵys Ishki ister departamenti bastyǵynyń birinshi orynbasary qyzmetin atqarǵan. Tereń bilim men jınaqy tájirıbeni serigine aınaldyra júrip, polkovnık ózinen keıingi ósip kele jatqan jas mamandarǵa aqylman basshy, janashyr aǵaǵa aınaldy.
О́z salasynyń úzdik qyzmetkeri. Tipti, kóptegen nagradalar men tós belgilerdiń ıegeri. Bıyl da Ishki ister organdaryndaǵy Eren eńbegi úshin II dárejeli «Aıbyn» ordenin jarqyratyp keýdesine taqty.
Jalpy Musaevtar yntymaǵy berik, berekesi shalqyǵan shańyraqtyń ıeleri. Sondaı-aq ishki ister salasynda da qanatyn keń jaıǵan dınastııa dástúrin jalǵaýshylar. О́zinen keıingi inileri Sadýbek pen Dosymbek, qaryndasy Gúldana da ulaǵatty aǵanyń izin jalǵap, polıseı atanǵan. Búgin de olardyń árqaısysy qyzmetterin abyroımen atqaryp júr.
«Baǵalaı bilgenge baq qonar, qýana bilgenge qut qonar», degen naqyl da Musaevtar otbasyna arnalyp aıtylǵandaı. Danııarbek О́metaıuly – asyl jar, tumarly ul men tulymdy qyz ósirgen baqytty áke.
