Sport • 25 Maýsym, 2019

Eýropa oıyndary: Balýandar bozkilemge shyqty

145 retkórsetildi

Búgin Mınskide ótip jatqan Eýropa oıyndarynda erkin kúres sheberleri óz básekelerin bastady. Bul jarysta Olımpıada oıyndarynyń baǵdarlamasyna engen alty salmaq dárejesi boıynsha júldeler sarapqa salynýda.

Qart qurlyqtyń ókilderi bul jarysty ústimizdegi jyldyń qyrkúıek aıynda Nur-Sultanda ótetin lısenzııalyq álem chempıonatyna daıarlyq retinde qarastyrýda. Bul kúnderi Belarýs eliniń astanasyna ataǵy alysqa jaıylǵan balýandardyń kóbi jınaldy. Máselen, erkin kúresten ótip jatqan jarysta Olımpıada chempıondary –  reseılik Abdýlrashıd Sadýlaev, túrkııalyq Taha Aqgúl, grýzııalyq Vladımır Hınchegashvılı, Olımpıada oıyndarynyń júldegeleri – Hadjı Alıev, Togrýl Asgarov, Djabraıl Gasanov (barlyǵy da – Ázirbaıjannan), Frank Chamızo (Italııa), Soner Demırtash (Túrkııa), Geno Petrıashvılı (Grýzııa), Ibragım Saıdov (Belarýs) jáne taǵy basqa sańlaqtar kúsh synasýda. Jáne de ár jyldary álem jáne Eýropa chempıonattarynda jeńis tuǵyryna kóterilgen saıypqyrandardyń da Eýropa oıyndarynda atoı salýlaryna tamasha múmkindikteri bar.

Alǵashqy jarys kúni (25 maýsym) 57, 74, 86 jáne 125 keli salmaq dárejeleriniń júldeleri sarapqa salynýda. 26 maýsymda 65 jáne 97 kılo salmaqtaǵy bastapqy básekeler jáne 57, 74, 86 jáne 125 kılo salmaqtaǵy fınaldyq saıystar ótedi.   

Grek-rım jáne áıelder kúresinen ótetin jarysta da qart qurlyqtyń kil myqtylary kúsh synasady. Eýropa oıyndarynda kúres túrlerinen barlyǵy 50 memleketten kelgen 288 balýan óner kórsetedi. Olar 18 júlde jıyntyǵyn sarapqa salady. 

Sońǵy jańalyqtar

Qazalyda retro-festıval ótti

Aımaqtar • Keshe

Uqsas jańalyqtar