Kún tártibindegi jalǵyz másele – tórtinshi sessııanyń jumysyn uzartýǵa baılanysty Úkimet basshysy Asqar Mamınge sóz berildi.
– Memleket basshysy Qasym-Jomart Toqaev sabaqtastyq negizinde Elbasy Nursultan Nazarbaevtyń áleýmettik strategııasyn jalǵastyryp, halyqtyń ózekti máselelerin sheshýge baǵyttalǵan irgeli sharalardy qabyldaýda. Prezıdent áleýmettik turǵyda az qamtylǵan azamattardyń borysh júktemesin azaıtý sharalary týraly Jarlyqqa qol qoıdy. Osy qabyldanǵan sheshimniń arqasynda áleýmettik turmysy tómen azamattarǵa kómek kórsetiledi. Memleket basshysynyń tapsyrmasy boıynsha Úkimet halyqtyń eń ózekti áleýmettik máselelerin shuǵyl túrde sheshýge arnalǵan jáne halyqtyń ál-aýqatyn arttyrý maqsatynda jedel sharalar toptamasyn ázirledi, – dedi A.Mamın.
Úkimet basshysynyń aıtýyna qaraǵanda, osy sharalardyń iske asýy nátıjesinde aǵymdaǵy jyldyń aıaǵyna deıin jumyssyz 300 myńnan astam adam «Bastaý Bıznes» jáne «Jas kásipker» baǵdarlamalary boıynsha kásiptik bilim berý arqyly jumysqa ornalastyrý sharalarymen qamtylady. Sonymen qatar jeke kásipkerlikti uzaq merzimdi nesıeler jáne granttar usyný arqyly damytý sharalary, az qamtylǵan otbasylarǵa jaldamaly baspana qurylysy kólemin eki ese ósirý, jumys isteıtin jastarǵa jaldamaly úıdiń qurylysyn úsh esege arttyrý sharalary qolǵa alynady.
Sondaı-aq az qamtylǵan otbasylardyń balalaryna keshendi áleýmettik qoldaý sharalary uıymdastyrylady. Sonyń ishinde bıyl 5 myń bilim granty bólinip, tegin jol júrý, mektepter qajet zattarmen qamtamasyz etiledi.
– Osy mańyzdy úlken sharalardy iske asyrý úshin 2019-2021 jyldarǵa arnalǵan respýblıkalyq Bıýdjet týraly zańǵa ózgerister engizý qajet. Osyǵan baılanysty bıýdjetke engiziletin ózgeristerdi qarastyrý úshin Parlament sessııasynyń jumys merzimin uzartý máselesin qarastyrýdy suraımyn. Osy rette aldaǵy ýaqytta Parlament pen Úkimet atalǵan áleýmettik mańyzy úlken sharalardy qabyldaýda belsendi jumys atqaratynyna senemin, – dedi Úkimet basshysy.
Atalǵan usynys negizinde Májilis tóraǵasy Nurlan Nyǵmatýlın altynshy saılanǵan Parlamenttiń tórtinshi sessııasyn 5 shildege deıin uzartý múmkindigi bar ekenin jetkizdi.
– Memleket basshysy alǵa qoıǵan mindetterdi júzege asyrý úshin qos palata depýtattary osy bıýdjet jobasyn jan-jaqty talqylap, qabyldaýymyz qajet. Osyǵan baılanysty Senattaǵy áriptesterimizben aqyldastyq, Parlament sessııasy jumysynyń merzimin uzartýdy qarastyrdyq. Mundaı múmkindik bar. Osy jerde aıta ketý kerek, Konstıtýsııamyzdyń 59-babynyń 3-tarmaǵynda Parlamenttiń kezekti sessııasy qyrkúıektiń birinshi jumys kúninen maýsymnyń sońǵy jumys kúnine deıin ótkiziledi dep belgilengen. Sonymen birge Konstıtýsııalyq Keńestiń Konstıtýsııa normasyna bergen resmı túsindirmesin negizge ala otyryp, altynshy saılanǵan Parlamenttiń tórtinshi sessııasyn 2019 jylǵy 5 shildege deıin uzartýdy usynamyn, – dedi N.Nyǵmatýlın.
Atalǵan másele depýtattar tarapynan tolyq qoldaý taýyp, sessııa jumysy uzartylatyn bolyp sheshildi.
