Sýretshi Muratbek Jolaman týraly jubaıy Gúljamysh Bákeıqyzy osylaı eske alady. Abzal azamatynyń 33 jylǵa ǵana jetken qysqa ǵumyryn qolynyń taby qalǵan ár kartınasy jalǵastyratyndaı kóredi. «Tek 30 kartına salyp úlgerdi. 100-den astam sýreti sulba kúıinde qaldy», deıdi. Kim biledi, múmkin qoltańbasy dara sýretshiniń aıaqtalmaı qalǵan jumystaryn urpaqtary jalǵastyrar...
Sh.Sarıev atyndaǵy Atyraý oblystyq kórkemsýret jáne qoldanbaly sándik óner mýzeıinde Qazaqstan Sýretshiler birlestiginiń múshesi, belgili sýretshi Muratbek Jolamannyń «Rýhpen syrlasý» atty kórmesi ótti. Sharaǵa Qazaqstan men Qyrǵyzstannyń eńbek sińirgen qaıratkeri, kompozıtor, sýretshi Ilııa Jaqanov, Qazaqstannyń eńbek sińirgen qaıratkeri, Memlekettik syılyqtyń laýreaty Aqushtap Baqtygereeva, Qazaqstannyń Sýretshiler odaǵynyń tóraǵasy О́mirbek Jubanııazov pen Muratbek Jolamannyń zaıyby Gúljámish Bákeıqyzy qatysty.
Sýretshi Muratbek Jolamannyń jumystary Anglııa, Polsha, Koreıa, Túrkııa elderindegi mýzeılerde saqtaýly. «Qulager», «Edil-Jaıyq», «Saryn», «Tumar», «Qorqyttyń teńizge kelýi», «Qyzǵysh qus», «Attılanyń elesi» sekildi basqa da kartınalary sýretshiniń bıik óresin, joǵary talǵamy men qalam qýatyn anyq ańǵartady. Atyraýlyqtar kórmeni bir aı boıy tamashalaı alady.
ATYRAÝ
