Onyń aıtýynsha, Qorǵanys mınıstrligine júktelgen mindetterdiń biri – Arys arsenal qoımasyn tolyq joıý.
– Bul – Qorǵanys mınıstrliginiń mindeti. Qazirgi ýaqytta qarý-jaraq qoımasy mańaıynda ár jerden tutanǵan órt oshaqtary bar. Tıisinshe, Qorǵanys mınıstrligi men Tótenshe jaǵdaılar komıtetiniń bólimsheleri órt sóndirý jumystaryna jumyldyryldy, – dedi V.Bekker.
Komıtet tóraǵasy alasapyran ýaqytta úıleri tonalǵan arystyqtardan 85 aryz túskenin de habarlady.
– Úıine qaıtqan turǵyndar múlki joǵalǵany týraly 85 aryz túsirgen. Alaıda, onnan astam aryzdy ıeleri qaıtaryp aldy. Asa iri kólemde azyq-túlik urlaý faktisi tirkeldi. Bir adam kóligi urlanǵanyn habarlaǵan. Jalpy, ár oqıǵa boıynsha jedel-izdestirý toptary shuǵyl sharalar qabyldap jatyr, – dedi TJK tóraǵasy.
Baspasóz máslıhatynda V.Bekker tótenshe oqıǵanyń saldarynan kelgen shyǵynnyń áli tolyq eseptelip bolmaǵanyn aıtty.
– Shyǵyn kólemi shamamen 20 mlrd teńgege jýyqtaıdy. Bul sıfr ózgerýi de múmkin. Bul – aldyna ala boljanǵan málimet. Baǵalaýshylar áli de esep júrgizip jatyr. Sońǵy túsken derekter boıynsha 70-ke jýyq úı jermen-jeksen bolǵan. Ádepkide 8 myńnan astam úı búlindi degen derek bolǵan. Ázirge 6000 úıdiń búlingenin anyqtadyq, – deıdi V.Bekker.
Tótenshe jaǵdaılar komıtetiniń derekterine qaraǵanda, saperlik bólimshelerden 1287 adam 80 topqa bólinip, Arys aýmaǵyn tazartyp jatyr. Búginge deıin 11 400 oq-dári men bólshek tabylǵan. Oǵan qosa, arystyqtarǵa snarıad bólshekteri kezdesse, ne isteý kerektigi jappaı túsindirilgen. Onyń da sebebi bar, óıtkeni saperlik jumystar kezinde temir jol boıynan iske qosylǵan kúıi jarylmaı qalǵan jarylǵysh zat tabylǵan.
– Temir jol toraptaryn tazartý kezinde mamandar jarylmaǵan snarıad taýyp aldy. Jarylmady degenińiz bolmasa, ózdiginen iske qosylyp qalǵan. Muny kórgen saperlerdiń ózderi de qatty tańǵaldy, – dedi V.Bekker.
