Nesıege kólik alý jeńildeıdi

Statıstıka komıtetiniń deregine súıensek, jyl basynda elimizdegi jeńil kólikterdiń jalpy sany 3,8 mıllıonǵa jetipti. Sońǵy 10 jylda avtomobıl parki 49 paıyzǵa ulǵaıǵan. Turǵyndardyń sanyna shyǵar bolsaq, árbir 1000 adamǵa 211 kólikten keledi. Bir aıta keterligi, kólik sany kóbeıgenimen, avtopark eskirip barady. Eldegi kólikterdiń 64 paıyzy zaýyttan 10 jyldan astam ýaqyt buryn shyqqan.

Byltyr elimizde tirkelgen kólikterdiń 66 paıyzy, ıaǵnı 512 myńǵa jýyǵynyń jolda júrgenine 10 jyldan asypty. Munyń bárin nege aıtyp otyrmyz? Ulttyq bank bekitken jańa baǵdarlama bir jaǵynan otandyq avtoındýstrııaǵa serpin berse, ekinshiden, eski kólikterdi azaıtyp, turǵyndardyń jańa kólikke minýine áser etýge tıis.

– Avtokólikterdi nesıeleý aýqymynyń ulǵaıýy­na buǵan deıin bankterdiń óz qarajatynan bergen nesıesi áser etti. 11 myń avtokólik alýshy­ǵa 38,8 mıllıard teńge nesıe usynyldy. Belgilen­gen jyldyq syıaqy mólsheriniń 13-26 paıyz ara­lyǵynda, ıaǵnı birshama joǵary ekenine qaramastan, atalǵan kategorııadaǵy nesıege degen suranys artyp keledi,– delingen Ulttyq bank qabyldaǵan qujatta.

Sonymen jańa baǵdarlama boıynsha otandyq avtokólikti satyp alýshy azamattarǵa nesıe mynadaı mehanızm boıynsha berilmek. Birinshiden, Ulttyq bank «Qazaqstannyń ornyqtylyq qory» AQ-tyń jarǵylyq kapıtalyn satylap ulǵaıtady.

Ekinshiden, Qazaqstan Damý banki bul qordan oblıgasııa shyǵarý arqyly 20 mıllıard teńgege deıin qaryz alady. Ol 2019-2023 jyldar aralyǵynda teńge valıýtasymen, jylyna 0,15 paıyzdyq syıaqy mólsherlemesimen júrgiziledi. Odan keıin QDB otandyq avtokólikter tizimi men olarǵa beriletin lımıtterdi anyqtaıdy. Qaryzǵa alǵan qarajatty ekinshi deńgeıli bankterdiń esepshotyna ornalastyrady. Ekinshi deńgeıli bankter esepshotqa salynǵan qarjyny 18 aıda nesıege berip úlgerýge tıis.

Satyp alynatyn kólikterge qoıylatyn talaptar da belgili. Máselen, baǵasy 15 mıllıon teńgeden aspaýǵa tıis. Nesıe eń kóbi 7 jylǵa beriledi. Nesıe­niń jyldyq syıaqy mólsheri 4 paıyzdan aspaıdy.

Ulttyq banktiń jańa baǵdarlamasy otandyq avtokólikterdiń satylymyna jáne avtoparktiń jańarýyna yqpal etýge tıis dep joǵaryda aıtyp óttik. Oǵan qosa, jyldyq syıaqy mólsheriniń tómendigin eskersek, avtokólik satyp alýshylar úshin de qarjylyq jaǵynan áldeqaıda tıimdi bolady dep kútilýde.