«Shyǵarmashylyq múmkindikter álemi» atty respýblıkalyq festıvaline elimizdiń halyqaralyq, respýblıkalyq, oblystyq baıqaýlar men festıvaldardyń laýreattary, dıplomanttary, jas ánshiler, bıshiler, shyǵarmashylyq ujymdar men oqý ozattary jınaldy.
Segizinshi aýysymda «baldáýrendik» balalardyń shyǵarmashylyq qabiletterin jandandyrý jáne damytý maqsatynda «Shabyt» shyǵarmashylyq baıqaýy, «Eki juldyz» jobasy jáne «Kúmbirle, sazdy dombyra» mýzykalyq-tanymdyq keshi, «CreativeFEST» competition baıqaýy men kóptegen qyzyqty is-sharalar ótkizildi.
«Baldáýrende» jyl saıyn ulttyq qundylyǵymyzdy dáripteıtin, asyl muralarymyzdy, salt-dástúrimizdi damytý maqsatynda ártúrli taqyryptyq aýysymdar ótkizilip otyrady. Endeshe, atalǵan aýysymda ótkizilgen is-sharalardyń biri retinde Ulttyq dombyra kúnine arnalǵan «Kúmbirle, sazdy dombyra» mýzykalyq-tanymdyq keshi týraly aıtýǵa bolady.
Tól ónerimizdi damytýǵa arnalǵan kesh aýysymǵa jınalǵan ónerli balalardan quralǵan «Baldáýren» orkestriniń oryndaýyndaǵy Qurmanǵazynyń kúıi «Balbyraýynmen» ashyldy. Bul kesh asqaq jyr, sulý syrly kúı, qanatty sheshendik sóz, ulaǵatty terme syndy tunba bulaqtaı tól ónerimizdi nasıhattap, tilimizdi, dilimizdi jandandyryp, óner qudireti – dombyranyń úkisin jelbiretip, asqaqtatty.
Is-shara barysynda elimizdiń daryndy, shyǵarmashyl balalary óz ónerlerin kórsetip qana qoımaı, ulttyq ónerimizge baılanysty tanymdyq suraq-jaýaptarǵa belsendilikpen qatysty. Kesh sońynda balalar arnaıy syılyqtarmen, gramotalarmen marapattaldy.
Aınur ERDENOVA,
«Baldáýren» ROSO baspasóz hatshysy
