Qazaqstan • 09 Shilde, 2019

Jármeńke kórigin qyzdyrdy

462 ret

kórsetildi

1 mın

oqý úshin

Elorda kúnine oraı Nur-Sultan qalasynda dástúrli aýylsharýashylyq jármeńkeleri ótti. Bas qalamyzǵa respýblıkanyń tórt óńirinen jalpy kólemi 800 tonna bolatyn azyq-túlik kerýenderi keldi.

Arnur ASQAR

6-7 shilde kúnderi Batys Qazaqstan jáne Qaraǵandy oblystary «Qazaqstan» sport kesheniniń alańynda qala turǵyndaryna óz ónimderin usyndy. Al «Han Shatyr» saýda oıyn-saýyq ortalyǵynyń janyndaǵy arnaıy alańda Pavlodar men Aqmola oblystary aýylsharýashylyq ónimderin óndirýshileriniń qatysýymen jármeńke ótti.

Jármeńkege aǵylyp kelgen halyqta qısap joq. Sebebi sórege túsken azyq-túliktiń baǵasy naryqtaǵymen salystyrǵanda 20%-ǵa tómen boldy. Árıne bul elorda turǵyndary men qonaqtaryna tońazytqyshtaryn toltyryp alýǵa jaqsy múmkindik.

Oblystardan kelgen azyq-túlikterdiń jalpy kólemi 800 tonnadan asatynyn joǵaryda aıttyq. О́nimderdiń negizin et, shujyq, et konservileri, balyq, sary maı, ósimdik maıy, sút, qyshqyl sút ónimderi, kókónister men jemister, pechene, kámpıt, kúrish, makaron, nan-toqash ónimderi jáne taǵy basqalary qurady.

Aýyl sharýashylyǵy ónimderinen basqa, jármeńke aýmaǵynda ár oblys óz óńiriniń mádenıeti men dástúrlerin kórsetetin kórkemónerpazdar ujymdarynyń qatysýymen konsert qoıdy.

– Kesheden beri osy alańda konsert qoıylyp jatyr. Bizdiń oblystyń ónerpazdary óner kórsetip, baýyrsaq-shoý, qymyz-shoý ótkizdi. Kásipkerlerimiz ónimderiniń jaqsy ótip jatqanyn aıtady. Taýar alýǵa kelgen halyqtyń da ónimniń sapasyna, baǵasyna kóńili tolǵanyn baıqadyq. Biraz otbasyǵa azyq-túlik tegin taratyldy, – deıdi Qaraǵandy oblysy aýyl sharýashylyǵy basqarmasy bastyǵynyń orynbasary Syrym Boshpanov.