– Qazirgi zamanǵy medısına kóz aýrýlaryn birneshe mınýt ishinde arnaıy jabdyqtyń kómegimen tekserip bere alady. Biraq kóz dárigerine sezimtaldyq pen janashyrlyq, kózi aýyrǵan adamǵa kóńil bólý, jan jylýy qajet, – deıdi Qasymhan.
Rasynda, bul kúnderi aýrýhananyń oftalmologııa bólimshesiniń dárigerleri eń zamanaýı jabdyqtarmen, atap aıtqanda oftalmologııalyq koagýlıasııalaýshy lazer kogerentti tomograf ýltradybystyq operasııalyq júıe arqyly emdeý sharalaryn júrgizedi.
– Mysaly, INFINITI VISION oftalmologııalyq júıesin engizý joǵary mamandandyrylǵan medısınalyq trabekýloektomııa, kóz almasynyń enýkleasııasyna kómek kórsetýge múmkindik berdi. Sondaı-aq stasıonarda emdelý ýaqytyn qysqartady, kózdiń tez jazylýyna áser etedi, – deıdi keıipkerimiz.
Búginde kózdiń kórý deńgeıiniń nasharlaýy, uıashyqtyń buldyraýy balalarmen jastar arasynda jıi kezdese bastady. Buryn bul syrqatpen dárigerlerge qarttar ǵana júginetin edi. Qazir oftalmologııalyq ortalyqqa kúnine 100-ge jýyq adam keledi. Jylyna 4 myńnan astam ota jasalady. Ortalyqta kórý qabatyn lazer arqyly emdeý múmkindigi bar. Jańa lazerli apparattardy qoldanǵannan beri oftalmologııa bólimshesinde naýqastardyń kezegi azaıdy.
– Kóz qysymyn tekserip, hırýrgııalyq otalar jasap, kóz tamyrlaryn qalpyna keltiremiz. Aǵza aýrýlaryn kóz arqyly anyqtaýǵa bolady. Kózge kúrdeli operasııalar da jasalady. Ota túrleri joǵary tehnologııaly qurylǵylar arqyly dene jaraqatynsyz jasalady, – deıdi Q.Tileýbaev.
Buryn tirkeýge turǵannan keıin jaýap alý úshin jarty jyl kútetin. Al qazir qalaǵan dárigerinen 2-3 aptanyń ishinde jaýap ala alady. Kepildendirilgen tegin medısınalyq kómek aıasynda emhanalardyń anyqtamasymen kelgen naýqastarǵa tegin ota jasalady.
Sonymen qatar Mindetti áleýmettik medısınalyq saqtandyrý júıesi aıasynda oftalmologııalyq qyzmet túrleri endi saqtandyrylǵan adamdarǵa qoljetimdi bolmaq. Al, skrınıngtik tekserýlerge keletin bolsaq, oftolmolog dárigerler 40 jastan asqandarǵa kóz qysymyn teksertýge keńes beredi.
Aýstralııalyq «Tango» lazerlik qondyrǵysy eki baǵyt boıynsha emdeýge múmkindik beredi. Olardyń biri – glaýkomany emdeý, ekinshisi – qaıtalama kataraktany emdeý.
Al, kompıýterlik kórý sındromy – ýaqytynyń basym kópshiligin kompıýter ekranynyń aldynda ótkizetin adamdardyń kórý qabiletiniń spesıfıkalyq tómendeýi. Astenopııa (kórý qabiletiniń sharshaýy) degenimiz – kózge salmaq túsire otyryp, jumys istegennen keıin kózdiń aınalasynda túıilip aýyrý, kúıdirý, «qum» túsip ketkendeı bolý, kóz janarynyń aınalasyndaǵy aqtyń qyzarýy, qaraǵan nárseniń bulyńǵyr bolyp kórinýi tárizdi jaǵymsyz áserlerdiń paıda bolýyna aparyp soqtyratyn fýnksıonaldyq aýytqýshylyqtar.
Jalpy, em alýshylardyń arasynda jastar basym, kóbinese mıopııa aýrýy kezdesedi. Olaı bolsa, árbir ata-ana balalarynyń bolashaǵyna nemquraıly qaramaǵany durys.
Biz áńgimelep otyrǵan Qasymhan Tileýbaev oblystyq aýrýhanada 20 jylǵa taıaý ýaqyt qyzmet etip keledi. Al, Qasymhannyń ákesi Abylaıhan Tileýbaev ta oftalmologııa ortalyǵynda dáriger-ordınator. Anasy Ǵalııa nevrologııa salasynyń mamany.
Qasymhan da áke-sheshesi oqyp bilim alǵan Semeı medısınalyq ınıstıtýyn 1999 jyly bitirdi. Joldasy, súıikti jary Shaızat ta dáriger.
Bizdiń «kózge aq túsý degen ne?» degen saýalymyzǵa ol bylaı dep jaýap berdi:
– Kózge aqtyń túsýi – katarakta. Kóz burshaǵy buldyrap, qaraýytyp, aǵarady. Kózdi shel basqan kezinde sáýleniń kóz burshaǵyna ótýi qıyndaıdy. Kózdiń kórý qabileti kemıdi. Katarakta eki túrli bolyp keledi: týa bitken jáne júre paıda bolatyn. Júre paıda bolǵan katarakta keıde 40-50 jastan keıin bolady, birte-birte údeı túsip, kóz burshaǵy bulyńǵyr bolyp, perde jabylyp qalady. Bastapqy belgisi adamnyń kóziniń aldynda bir nárse turǵandaı seziledi. Ota arqyly emdeıdi, – dep jaýap berdi dáriger.
