Sondaı-aq qala ákimi megapolısti damytý úshin jalpy quny 1 trln 284 mlrd teńgeni quraıtyn 10 baǵyt boıynsha 89 joba Úkimet músheleri tarapynan tolyq qoldaý tapqandyǵyn jetkizdi.
Erekshe nazar aýdaratyn jaıt, keshendi jospardy iske asyrý nátıjesinde bıýdjetke júktemeni azaıtý úshin, 836 mlrd teńge nemese josparlanǵan somanyń 65 paıyz jeke ınvestorlar esebinen júzege asyrylady. 2023 jylǵa qaraı Shymkentte ortalyqtandyrylǵan sýmen jabdyqtaýǵa qol jetkizý 93-ten 98%-ǵa deıin ulǵaıady. Al, tabıǵı gazben qamtamasyz etý 92-den 98 paıyzǵa deıin, ortalyqtandyrylǵan kárizge qol jetkizý 49-dan 75 paıyzǵa deıin, sapaly elektrmen jabdyqtaý 91-den 96 paıyzǵa deıin ulǵaımaq.
Joldardyń ótkizý qabileti táýligine 75 000 kólikke deıin ósse, mektepterde úsh aýysymdy oqytý tolyǵymen joıylady. Qalanyń sporttyq kelbeti sanalǵan Qajymuqan atyndaǵy Ortalyq stadıon jóndeýden ótip, ÝEFA talaptaryna tolyq saı bolady. Mıllıondy qala úshin turǵyn úımen qamtamasyz etý máselesi oń sheshimin taýyp, bir adamǵa 24-ten 27 sharshy metrge deıin artpaq.
Eń bastysy, qala ekonomıkasy 3,5 trıllıon teńgege deıin ósip, jaqyn jyldary 60 myńǵa jýyq jumys orny ashylady.
Eske salar bolsaq, keshe Nur-Sultan qalasynda Premer-Mınıstr Asqar Uzaqbaıuly Mamınniń basshylyǵymen Úkimet otyrysy ótti. Onda qala əkimi Ǵabıdolla Ábdirahymov 2023 jylǵa deıin shahardy damytýdyń keshendi josparyn tanystyrǵan bolatyn.
