Kásiporyn ashqyń kele me? Kel de, iske kirise ber!
Senbi, 26 qańtar 2013 7:17
Bir kezderi Shymkent qalasynyń dańqyn shartarapqa tanytyp, ataǵyn dúrkiretken «Shına» zaýytynyń keıingi jyldary jumysy toqtap, kúnnen-kúnge tonalyp, kóz aldymyzda joq bolyp bara jatqany kóptiń kóńiline kirbiń túsirip júrgeni ras edi. Birneshe myńdaǵan jandy jumyspen qamtyp, murjasy burqyrap, qazany qyz-qyz qaınap jatatyn zaýyttyń mundaı múshkil halge túsýi qaltaly azamattardy da qatty oılandyrsa kerek. Sóıtip, osydan eki jyl buryn zaýyt aýmaǵynan «Ordabasy» ındýstrııalyq aımaǵy ashylǵan bolatyn.
Senbi, 26 qańtar 2013 7:17
Bir kezderi Shymkent qalasynyń dańqyn shartarapqa tanytyp, ataǵyn dúrkiretken «Shına» zaýytynyń keıingi jyldary jumysy toqtap, kúnnen-kúnge tonalyp, kóz aldymyzda joq bolyp bara jatqany kóptiń kóńiline kirbiń túsirip júrgeni ras edi. Birneshe myńdaǵan jandy jumyspen qamtyp, murjasy burqyrap, qazany qyz-qyz qaınap jatatyn zaýyttyń mundaı múshkil halge túsýi qaltaly azamattardy da qatty oılandyrsa kerek. Sóıtip, osydan eki jyl buryn zaýyt aýmaǵynan «Ordabasy» ındýstrııalyq aımaǵy ashylǵan bolatyn.
Búginde bul aýmaqta 30-ǵa jýyq kásiporyn ornalasyp, birneshe jyldan beri qańyrap bos jatqan ǵımarattar kádege jaraýda. 1250-ge jýyq adam osy kásiporyndardan nesibesin taýyp, turaqty jumyspen qamtyldy. Bolashaqta bes myńǵa deıin adamdy turaqty jumyspen qamtýǵa múmkindik bar. Aımaq aýmaǵynda 143 gektar jer telimi men 335 myń sharshy metr óndiristik ǵımarat, 33 myń sharshy metr qoıma, 5 myń sharshy metr konteınerlik alań men 18 myń sharshy metr keńse ǵımaraty bar. Osynyń barlyǵy oblys ortalyǵynda Elbasy erekshe tapsyrǵan kásipkerliktiń qaryshtap qanat jaıýyna mol septigin tıgizbek. Bul Shymkent qalasyndaǵy salyq túsimin arttyryp, bıýdjettiń búıirin tompaıta túseri daýsyz. Al bıýdjet qarjysy kóbeıse halyqtyń kókeıin mazalaǵan kóptegen máseleler ońynan sheshiletini túsinikti.
Bul aımaqta kásibin dóńgeletkisi kelgen kásipkerler úshin jańadan ınfraqurylym, óndiristik, keńse ǵımarattaryn, qoıma, temir jol tuıyǵy sekildi asa qajet nysandardy salýdyń qajeti joq. Olar daıyn. Tek kásiporynǵa qajetti qural-jabdyqtardy ornatsa bolǵany. Kásiporyn ashqyń keledi me, ıdeıa bar ma, paıdalan da, kedergisiz iske kirise ber.
Taǵy bir aıta keterligi, munda kommýnaldyq qyzmetterdiń barlyq túri, meıli, ol sý, gaz, jaryq bolsyn, qaladaǵy tarıften 30 paıyzǵa tómen eken. Osynyń arqasynda aımaqqa jaqyn aýmaqta qosymsha 37 kásiporyn iske qosylypty. Onda da myńnan astam adam turaqty jumyspen qamtylǵan.
«Indýstrııalyq aımaqtyń jumysyn júrgizý, jandandyrý maqsatynda birneshe shet memleketterdiń tájirıbesimen tanysyp qaıttym. Sonyń ishinde Túrkııanyń tásili kóńilime qonymdy boldy. Onda da týra bizdikindeı ádisti qoldanady. Tek olardaǵy iske asyrylyp jatqan megajobalardyń kólemi óte úlken. Jaqyn bolashaqta túrkııalyq OSTIM korporasııasymen birlesken jobany, ıaǵnı qazaq-túrik aımaqtyq óndiristik ortalyǵyn qurý josparda bar. Atalǵan korporasııa Túrkııamen qatar Egıpet, Irak jáne Ońtústik-shyǵys Azııa, Soltústik Afrıka memleketterindegi ındýstrııalyq aımaqtardy meılinshe damytýǵa qol jetkizgen iri ortalyq. Ankara qalasynyń ózindegi aımaqta ǵana 5 myńnan astam kásiporyn ondaǵan myń ónim túrlerin shyǵaryp jatyr», deıdi «Indýstrııalyq aımaq «Ordabasy» JShS-niń dırektory Nurǵazy Buharbaev.
Búginde bul zaýyt aýmaǵynan 30-ǵa jýyq ónim túri shyǵarylady. Olardyń arasynda túrli qurylys zattary, sý men kógildir otynǵa arnalǵan plastık qubyrlar, elektr únemdegish lampalar, turmystyq sabyn, júk jáne jeńil avtokólikterdiń aldyńǵy terezeleri, plastık terezeler, motor maıy jáne basqa da ónimder shyǵarylýda. Máselen, alıneks shyǵaratyn «Alina Trade» JShS aıyna 40 vagon ónim shyǵaryp jatyr. Budan bólek 5 gektar jerge jylyjaı ornalastyrylǵan.
Jalpy alǵanda oblys ındýstrııalandyrý kartasy aıasynda 2015 jylǵa deıin 111 jobany iske asyrýdy josparlap otyr. О́tken jyly 27 joba iske qosylyp, 1820 jumys orny ashyldy. Al, jyl sońynda taǵy 2 joba iske qosylyp, 355 adam jumyspen qamtyldy. Karta aıasynda iske qosylǵan kásiporyndar 14,5 mlrd. teńgeniń ónimin shyǵardy. Árıne, «Ordabasy» ındýstrııalyq aımaǵy keshegi «Shına» zaýytynyń kezindegideı jumysshysy sapyrylysyp, ishi quj-quj qaınap jatpasa da áıteýir bir tirshiliktiń nyshany bar. Jáne ol endi-endi shym-shymdap qaınap kele jatqan tirshilik. Iri kásipkerlerge keń jol ashqan bul aımaqtyń bolashaǵy áli alda ekeni aıdan anyq.
Oralhan DÁÝIT,
«Egemen Qazaqstan».
ShYMKENT.
