Meniń de týyp-ósken aýylym Aqbaı-Qyzylbaıda sondaı ardaqty azamattar kóp. Solardyń biri – medbıke bolyp eńbek etip, el qurmetine bólenip júrgen medısına salasynyń ardageri Urlyha Saǵyntaıqyzy Qabıeva. Anam marqum Jaıken Raqymqyzy kózi tirisinde aýyl medbıkesi U.Saǵyntaıqyzyna óte rıza bolyp, men oqýdan kelgende jıi aıtyp otyratyn. О́ıtkeni bizdiń keıipkerimiz kóptiń batasyn alǵan jan.
Uzaq jyldar boıy dárigerlik, adamgershilik paryzyn adal oryndap, kún-tún demeı basy aýyryp, baltyry syzdaǵan adamdarǵa jedel kómek kórsetip kele jatqan maman aýyl turǵyndarynyń seneri de, súıeneri de bola bildi. Árıne bir kezderi keńshar ortalyǵy bolǵan eldi mekendegi emdeý ambýlatorııalyq aýrýhanasyn basqarǵan bilikti mamandar – marqum Qaıyr Razbekov, Maıra Súleımenova jáne osy aýrýhanada eńbek etip, dárigerlik kómegimen el qurmetine bólengen barlyq aq halatty abzal jandarǵa halyqtyń dán rıza ekenin jaqsy bilemin. Meniń de alǵysym sheksiz. Anam marqum aýyrǵanda: «Urqııanyń, Qaıyrkenniń, Maırashtyń ystyq ýkolynan, jyly sózinen jazylyp kettim», dep aıtyp otyratyn.
Urlyha Saǵyntaıqyzy Qaraǵandy oblysy, Ýlıanov aýdanynyń Barlysaı eldi mekeninde dúnıege kelipti. Sverdlov keńsharynyń on jyldyq mektebin bitirip, 1976 jyly Qaraǵandy medısına ýchılıshesiniń feldsher mamandyǵy boıynsha úzdik bitiredi. Dárigerlik qyzmetin Qarqaraly aýdanyna qarasty Q.Amanjolov atyndaǵy keńshardyń Aqbaı-Qyzylbaı bólimshesinde FAP meńgerýshisi bolyp bastaǵan. Dárigerlik qyzmetinde ózin bilikti de bilimdi maman, bilgir dáriger retinde kórsete bildi.
1989-1994 jyldary Qaraǵandy oblysy, Taldy aýdany, jergilikti aýdandyq Frýnze selolyq keńesiniń depýtaty bolyp saılanǵan. Bilikti dárigerdiń is-tájirıbesi aýdandyq, oblystyq semınarlarda talaı márte nasıhattaldy. Abyroıly eńbegi elenip aýdandyq, oblystyq densaýlyq saqtaý basqarmalarynyń Qurmet gramotalarymen birneshe ret marapattalǵan. Iаǵnı, onyń etken eńbegi eskerýsiz qalǵan joq.
