Saıasat • 12 Shilde, 2019

Depýtattar el ishinde

287 ret

kórsetildi

6 mın

oqý úshin

Parlament depýtattarynyń aımaqtarǵa sapary bastaldy. Halyq qalaýlylary el ishinde saılaýshylarmen kezdesýlerinde óndiris oryndarynyń áleýmettik-mádenı ortalyqtardyń ujymdarymen júzdesip, elimizdegi áleýmettik-ekonomıkalyq baǵdarlamalardyń mán-jaıyn túsindirý jumystaryn júrgizýde, dep habarlady Parlament Senaty jáne Májilisiniń baspasóz qyzmeti.

Egemen Qazaqstan

Alǵashqylardyń biri bolyp Parlament Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed Nur-Sultan qalasyndaǵy jańadan ashylǵan №4 órt sóndirý bóliminde jáne elimizdiń Ulttyq ulanynyń jedel maqsattaǵy brıgadasy – 5573 áskerı bóliminde boldy.

Senator kezdesý barysynda órt sóndirý salasynyń jańa tehnıkasymen jáne órt sóndirý bóliminiń jabdyqtalýymen tanysyp, órt sóndirýshiler jáne qutqarýshylarmen pikir almasty.

Kezdesýde M.Qul-Muhammed órt qaýipsizdigi, áleýmettik nysandardy saqtandyrý, halyqty tótenshe jaǵdaı kezinde jedel áreket etýge úıretý, ónerkásip qaýipsizdigi jaǵdaıyndaǵy talaptardy qataıtý máselelerin kóterdi.

* * *

Májilis depýtattary Vasılıı Oleınık pen Gennadıı Shıpovskıh Shyǵys Qazaqstan oblysyndaǵy sapary barysynda О́skemendegi «Sılýmın-Vostok» JShS kásipornynyń qyzmetkerlerimen kezdesti.

Kezdesýde depýtattar Memleket basshysy Qasym-Jomart Toqaevtyń naqty áleýmettik tapsyrmalary týraly aıtty.

Atalǵan seriktestikte depýtattarǵa óndiristik jabdyq servıstik qyzmet kórsetý jáne IT-tehnologııalar ınnovasııalyq oqý ortalyǵy tanystyryldy. Ortalyqtyń basty maqsaty – ónerkásiptik kásiporyndardyń qyzmetkerlerin jáne stýdent-praktıkanttardy oqytý jáne olardyń biliktiligin arttyrý.

* * *

Májilis depýtattary Qojahan Jabaǵıev pen Ábdimanap Bekturǵanov Jambyl oblysyna sapary barysynda táýligine 80 tonna sút ónimderin óndiretin zaýyttyń eńbek ujymymen kezdesip, kásiporyn jumysymen tanysty.

Eńbek ujymymen kezdesýde depýtattar elimizdegi áleýmettik bastamalar týraly aıtyp, jumysshylardy qyzyqtyrǵan suraqtarǵa jaýap berdi.

О́z kezeginde, kásiporyn dırektory Ábdiǵalı Begimbetov búgingi tańda sút baǵytyndaǵy 4 aýyl sharýashylyǵy kooperatıvimen birlese jumys júrgizip jatqandaryn, aldaǵy ýaqytta kooperatıvter sanyn 10-ǵa jetkizýdi josparlap otyrǵandaryn jetkizdi.

* * *

Májilis depýtattary Irına Aronova, Ivan Klımenko men Albert Raý Qostanaı oblysyndaǵy Altynsarın aýdanyna qarasty Dokýchaev aýylyndaǵy sý qubyrlaryn júrgizý jumystarymen tanysty.

Búginde «Aımaqtardy damytý-2020» baǵdarlamasy aıasynda munda 20 shaqyrym qubyr tartý kózdelýde. Jobanyń jalpy quny 779 mln teńgeni quraıdy. Ázirge birinshi uńǵymanyń qurylysy júrgizilýde. Nysanda 40 adam jumys isteýde.

Jalpy, Dokýchaev aýylyndaǵy sý júıesi mańyzdy jobalardyń biri. Qurylys jumystary keler jyly aıaqtalady dep kútilýde. 2015-2019 jyldar aralyǵynda Qostanaı oblysynda 15 joba júzege asqan. «Nurly jol» jáne «О́ńirlerdi damytý» baǵdarlamalary osylaısha óńirdiń ózekti máselesin ońtaıly sheship keledi. Bul baǵyttaǵy jumystar báseńdemek emes.

* * *

Al Syr óńirine jumys saparymen barǵan Májilis depýtattary Abzal Eralıev, Balaıym Kesebaeva, Baıdildá Jylqyshıev jáne Taras Hıtýov «Balameken» jobasy aıasynda salynǵan turǵyn úıler qurylysymen tanysyp, jergilikti halyqpen júzdesti.

Osydan birer aı buryn, «Báıterek» shaǵyn aýdanynda turmysy tómen kóp balaly otbasylar úshin 150 baspananyń qurylysy bastalǵan bolatyn. Búginde qos páterli 100 otbasyna arnalǵan 50 úıdiń qurylysy aıaqtalyp, turǵyndar qonystanǵan. Jańa mekenniń alǵashqy qonystanýshylary – kóp balaly otbasylar.

Elbasynyń halyqty áleýmettik qoldaý baǵytyndaǵy tapsyrmasynyń nátıjeli júzege asyrylýyna kóz jetkizgen májilis depýtattary da joba aıasyndaǵy jumystarǵa oń baǵasyn berdi.

* * *

Al Májilis depýtattary Aızada Qurmanova, Aıgúl Nurkına, Aleksandr Sýslov jáne Jámıla Nurmanbetova Pavlodar oblystyq jedel medısınalyq járdem stansasy ujymymen kezdesti.

Kezdesý barysynda Májilis depýtaty J.Nurmanbetova sóz alyp, Qazaqstannyń Tuńǵysh Prezıdenti – Elbasy Nursultan Nazarbaevtyń 2018 jylǵy 5 qazandaǵy Qazaqstan halqyna Joldaýynda medısınalyq qyzmet sapasyn kóterý máselesine mańyz bergenin atap ótti.

* * *

Májilis depýtattary Záýresh Amanjolova, Janat Omarbekova, Gúlnara Bıjanova jáne Káribaı Musyrman Soltústik Qazaqstan oblysynyń Maǵjan Jumabaev aýdanyndaǵy «Noǵaıbaı» JShS-ne bardy.

Onda depýtattar dándi, maıly jáne azyqtyq daqyldardy ósirýmen aınalysatyn kásiporynnyń qyzmetimen tanysty.

– «Noǵaıbaı» JShS-niń tájirıbesi aýylda kásipkerlikti damytýdyń jarqyn úlgisi bolyp tabylady. Budan basqa, bul mesenattyqty damytýdyń tamasha úlgisi. Kásiporyn basshysynyń kúshimen kóptegen ınfraqurylym nysandary salyndy, turǵyndarǵa belsendi kómek kórsetiledi. Árbir kásipker aımaqtyń áleýmettik-ekonomıkalyq damýyna belsendi qatysyp, óz kómegin kórsetýi tıis. Sondyqtan osyndaı úlgige bizdiń kásipkerlerimizdiń kópshiligi súıenýi tıis, – dep atap ótti sapar barysynda Májilis depýtaty Káribaı Musyrman.

* * *

Májilis depýtattary Baqytjan Ertaev, Evgenıı Kozlov jáne Irına Ýnjakova Mańǵystaý oblysyna jasaǵan jumys sapary barysynda Aqtaýdaǵy turǵyn úı, kommýnaldy-turmystyq jáne ónerkásiptik baǵyttardaǵy nysandardy jylýmen, sýmen qamtýǵa jaýapty «Kaspıı jylý, sý arnasy» MKK ujymymen kezdesý ótkizdi.

Depýtattar kezdesý barysynda Májiliste atqarylyp jatqan jumystar, eldiń erteńi jarqyn bolýy úshin bilikti mamandardy oqytý, áleýmettik máselelerdiń sheshilýi, jastardyń róli týraly oı bólisti.

Sonymen qatar mekeme qyzmetkerlerin tolǵandyrǵan barlyq suraqtarǵa tolyqtaı jaýap berip, olardyń usynys-pikirlerin tyńdady.