Jyr alybymen júzdesken qyz

«Lıteratýrnaıa gazeta» basylymy­nyń 1936 jylǵy №27 sanynda «Teatralnaıa smena Kazahstana» degen maqala jarııalanǵan. Osy maqalada: «Hasııa Kamardınova – 19 jas­ta. On jeti jyl buryn, azamat soǵysy kezinde onyń ákesi qaza tapty. Bir jyldan keıin anasy qaıtys boldy. Úsh jasar qyzdy ájesi óz qolyna aldy, on jasynda mektepke berdi. Hasııa Almatyda dúnıege kelip, sonda ósti. Sol jerde ol alǵash ret teatrǵa baryp, úlken áserge bólendi» – dep jazylǵan eken. Al «SSSR na stroıke» fotojýrnalynyń 1939 jylǵy №8 sany keńes odaǵynyń qyzdaryna arnalypty. Keıipker retinde úsh qyz – reseılik Tanıa Pyjova, ýkraınalyq Jenıa Adamenko jáne qazaqstandyq Hasııa Kamardınova tańdalǵan. Ma­qa­lada Hasııanyń jas­ta­ıy­nan aktrısa bolýdy ar­mandaǵa­ny jazylǵan. «Ol tul jetim edi. ­Bir jasynda ákesinen, eki jasyn­da anasynan aıyryldy. Sóıtip, Almatyda ájesiniń tárbıesinde ósti. Qyzdyń bar qııaly sahna bolatyn...» deı kelip, Hasııa­nyń teatr aktrısasy bolý úshin Máskeýge barǵanyn jaz­ǵan. Ol ýaqytta Máskeýdegi teatr óneri ınstıtýty janynda qa­zaq stýdııasy jumys isteıtin. Hasııa qyz Ǵaını Haırýllına, Gúljahan Ǵalıeva sekildi qa­zaq qyzdarymen birge osy stýdııada oqyp, 1938 jyly oqýyn támamdady.

Máskeýde oqyǵan jas óner­­pazdar Almatyda Karlo Gol­donıdiń «Eki myrzaǵa – bir qyz­metshi» pesasyn qoıdy. Basty róldiń birin Hasııa oınady. Qoıylymnyń bir kó­rinisi Jambyl aqynǵa arnaıy kórsetildi. Dalaǵa kilem tóselip, jas ártister aqynnyń aldynda sahna ónerin qoıdy.

Qoıylymnan soń Hasııa Jambylmen jeke kezdesedi. Jyr alyby qazaq qyzy­nyń ónerine súısinip, oǵan jyrdan shashý shashqan eken. Jambyldyń bul arnaýy orys tiline aýdarylyp, «Pesnıa o devýshke» («Qyz týraly jyr») degen ataýmen orys basylymdarynda jarııalanypty («SSSR na stroıke» jýrnaly, №8, 1939 jyl). О́leń «Prekrasnaıa devýshka ız Kazahstana! Ty ıablonı tonshe, nejnee tıýlpana. I znoınym rýmıansem krasýeshsıa ty, Kak smýgloe ıabloko Alma-Aty» dep bastalady. Alaıda bul óleńniń qazaq tilindegi túpnusqasyn aqyn­nyń kitaptarynan kezdestire almadyq.

Hasııa keıin qazirgi Muhtar Áýezov, Ǵabıt Músirepov atyn­daǵy teatrlarda, basqa da óner ordalarynda qyzmet etip, ­aktrısa bolamyn degen bala kún­gi armanyna qol jetkizdi.