12-13 shilde aralyǵynda Aral óńiri balyqshylarynyń dástúrli 5-shi sletinde oblystyń balyq sharýashylyǵy salasyndaǵy jetistikteri qorytyndylanyp, aldaǵy josparlary anyqtaldy.
Is-sharaǵa balyq aýlaý uıymdarynyń basshylary men qyzmetkerleri – barlyǵy 500-ge jýyq adam qatysty.
Slettiń birinshi kúni "Balyq sharýashylyǵy ǵylymı-óndiristik ortalyǵy" JShS Aral fılıaly bazasynda "Taýarlyq balyq sharýashylyqtaryn damytýdyń múmkindikteri" atty ǵylymı-praktıkalyq konferensııa ótti.
Ekinshi kúni sletke qatysýshylar balyq ónimderi kórmesimen jáne aımaqtyń balyq sharýashylyǵynyń damý tarıhynan syr shertetin jádigerlermen tanysyp, salanyń úzdikteri men ardagerlerin marapattaý rásimine qatysty.
V Balyqshylar sletiniń ashylý saltanatynda oblys ákiminiń orynbasary Baqytjan Namaev oblystaǵy balyq sharýashylyǵynyń damýy týraly aıtty.
«Keńes zamanynda Aral óńirinen (Aral, Qazaly aýdandary) 8 Keńes Odaǵynyń batyry, 21 Sosıalıstik Eńbek Eri, 2 Memlekettik syılyqtyń laýreaty shyqqanyn maqtanyshpen aıta alamyz. Búgingi kúni de teńiz daýylyna jelkenin jyqpaı, ómir soqpaǵyna moıymaı, ata kásipti jalǵastyryp júrgen balyqshylar legi barshylyq. Osy rette naryqtyq ekonomıka zamanynda balyqshylardyń basyn biriktirip, el ıgiligine qyzmet jasap júrgen Nurbek Áıimbetov, Amanbaı Erhatov, Tórebek Igilikov, Batyrhan Pirekeev, Tabyn Alenov, Shúkirbaı Abdýalıev, Aqylbek Baıqoshqarov, Sársenbaı Qoshqarbaev sııaqty el azamattarynyń, kásipker azamattardyń eńbegin erekshe atap ótkim keledi. Árqaısysy júzdegen jumys ornyn ashyp, ónimderin alys-jaqyn shetelderge shyǵaryp, oblys ekonomıkasyna qomaqty úlesterin qosyp otyr» dedi B.Namaev.
Oblys ákiminiń orynbasary qatysýshylardy shildeniń ekinshi jeksenbisine resmı bekitilgen Balyq sharýashylyǵy qyzmetkerleri kúni kásibı merekesimen quttyqtady.
Sondaı-aq salasynyń úzdikteri men ardagerleri marapattaldy.
Slettiń ashylý saltanatynda Aýyl sharýashylyǵy mınıstrligi Orman sharýashylyǵy jáne janýarlar dúnıesi komıtetiniń tóraǵasy Qaıyr Ryskeldınov pen Qazaq KSR balyq sharýashylyǵynyń eks-mınıstri Qudaıbergen Sarjanov sóz sóıledi.
Qyzylorda oblysy - respýblıkada balyq sharýashylyǵy damyǵan óńirlerdiń biri.
Oblys balyq aýlaý, óńdeý kólemi boıynsha respýblıkada 3-orynda. 2019 jyldyń 6 aıynda oblys boıynsha 2397 tonna balyq aýlanyp, respýblıkalyq bıýdjetke 53 mln teńge qarjy tústi. Búgingi kúni oblys boıynsha jyldyq qýattylyǵy 11 myń tonnadan asatyn 8 balyq óńdeý zaýyty jumys istep tur. Balyq ónimderiniń 13 túri shyǵarylýda.
Sońǵy 5 jylda balyq ónimderiniń eksporynyń kólemi 9 esege artty. 2018 jyly oblystan 3804 tonna balyq ónimderi eksporttalsa, bıyl 6 aıda eksport kólemi 2406,5 tonnany qurady.
Balyq ónimderi Reseı, Polsha, Gollandııa, Ýkraına, Ázirbaıjan, Qytaı elderine eksporttalyp jatyr.
