Qala qalpyna kelip, zaqymdalǵan úıler kúrdeli jóndeýden ótkenshe Arys qalasynyń 725 oqýshysy (Jambyl oblysy, Nur-Sultan qalasy, sondaı-aq Býrabaıda) elimizdiń ózge óńirlerine demalysqa jáne saıahatqa jiberilgen.
«Bóbek» ulttyq ǵylymı-praktıkalyq bilim berý jáne saýyqtyrý ortalyǵynyń qyzmetkerleri bir kúndik eńbekaqylaryn bólip, Arys qalasynyń 110 oqýshysyn «Bóbek» ortalyǵyna qabyldap, olardyń alańsyz bir aı kóleminde em-dom alyp, demalýlaryna jaǵdaı jasap otyr.
Shildeniń 18-shi juldyzynda «Bóbek» UǴPBBSO Adamnyń úılesimdi damý ınstıtýtynda arystyq oqýshylarmen «Arys, biz senimen birgemiz!» atty qaıyrymdylyq is-sharasy ótti.
Alǵashqy sózdi atalǵan ınstıtýttyń dırektory I.V.Kalacheva alyp, arystyq oqýshylarǵa «Bóbek» ortalyǵynyń qashanda qolushyn berip, qoldaýǵa ázir ekenin jetkizdi.
Balalar «Toǵyz joldyń toraby», «Ortalyq Azııa qaqpasy» dep sanalǵan Arys qalasy týraly beınefılmdi kórip, saǵynyshtaryn basqandaı boldy. Balalyqtyń aýylynan áli alystamaǵan mektep oqýshylarynyń erkin, aqyldy, zerek ekenderi vıktorına suraqtaryna bergen jaýaptarynan anyq baıqaldy. Bári shetterinen taqyldap, týǵan ólkeleriniń qyr-syryn búge-shigesine deıin biletinderi kóńilimizge kóktem uıalatty.
Aldaǵy bir aıǵa jýyq ýaqytta oqýshylar densaýlyǵyn qalpyna keltirýmen qatar «Bóbek» ortalyǵy uıymdastyrǵan túrli is-sharalarǵa, Almatynyń kórikti jerlerine, tarıhı oryndaryna, kitaphanalarǵa, ortalyqtaǵy observatorııaǵa saıahat jasaıdy.
Júzderinen tazalyqtyń lebi esip turǵan búldirshinder tus-tustan jamyrap «Biz barǵansha Arys qalpyna kelip, jaǵdaıy jaqsara ma?», deıdi. Ádette, «Bala ǵoı» dep qaraıtyn oqýshylardyń júrek túkpirinde ystyq uıalaryna degen qımastyq pen saǵynysh jatqanyn osy bir aýyz sózden baıqaýǵa bolady.
Balalardy respýblıkamyzdyń 14 oblysynan jáne Nur-Sultan, Almaty, Shymkent qalalarynan 170 arnaıy brıgada kelip, kúrdeli jóndeý jumystary bastalyp ketkeninen habardar ettik.
«Arystaǵy aýyr apat ekinshi qaıtalanbasyn», deıdi oqýshylar sóz kezegi kelgende. «Endi ondaı páleket bizdiń elimizdi aınalyp ótsin», deımiz biz de.
Iá, bul da Jaratqannyń bir synaǵy bolar. Eldiń birligi bekem, úkimettiń nıeti oń bolsyn deıik. Ýaqyt óte kele bári ornyna keledi. Adam balasy bir-birine rııasyz súıispenshilik pen jaqsylyq tilep, qaıyrymdylyq kórseter bolsa, qasirettiń ornyn áli-aq qýanysh basady. Baýyrynan talaı suńqarlar túlegen qasterli ólkege búkil Qazaqstan bolyp qolushyn berýdiń ózi el bolyp qalyptasyp, ult bolyp uıysqanymyzdyń kórinisi emeı nemene? Osyndaıda «Sóz járdeminen basqa bóz járdemi» degen támsil eriksiz eske túsedi. Júrektegi jarany tek meıirim ǵana jazatynyna taǵy da bir kózimiz jetkendeı...
Jeńedi qasiretti,
Qasıetti meıirim ǵana.
Qalatyn bul ómirde,
Adamnyń peıili ǵana.
Beý, Arys,
Kúńirenbe,
Taǵdyrdyń synaǵyna.
Bul bálkim eskertý ǵoı,
Bıliktiń qulaǵyna...
Úreıden arylmaǵan,
Kóńil ǵoı ári-sári.
Saspańdar, halyq barda,
Gúldener Arys áli.
Iá, eldiń erteńi jaryq, bolashaǵy nurly bolsyn!
Erǵalı BAQASh,
«Bóbek» UǴPBBSO AYDI baspa isi redaksııalaý sektorynyń redaktory
