Kaspıı qubyr konsorsıýmy elimizdegi ekologııa máselelerin sheshý men ońtaılandyrýdy qoldaý maqsatynda sońǵy úsh jylda 60 mln teńge jumsapty. Aıtalyq, 2016 jyly qazaq dalasyn meken etetin kıikterge arnalǵan spýtnık arqyly baılanys jasaıtyn asa qymbat qarǵybaý alyp berdi. Bul jolǵy ushqyshsyz ushatyn apparat QBSQ-nyń «Kıeli kıik» birlesken baǵdarlamasy aıasynda konsorsıýmnyń qarajatyna satyp alyndy. Kaspıı qubyr konsorsıýmy AQ bas dırektorynyń QR Úkimetimen baılanys boıynsha orynbasary Qaıyrgeldi Qabyldın aldaǵy ýaqytta mundaı qoldaýlar jalǵasyn taba beretinin aıtty. Al ushý apparaty Aqmola oblysy Qabanbaı aýylynda synaqtan ótkizildi.
- Eń aldymen Kaspıı qubyr konsarsıýmy ujymyna búgingideı qoldaýy úshin zor alǵysymdy bildirgim keledi. О́ıtkeni, qazirgi tańda bıoalýantúrlilikti saqtaý, kıikterdi qorǵaý syndy jumystar óte ózekti bolyp otyr. Sondyqtan zamanaýı tehnologııalar óz paıdasyn tıgizetini sózsiz. Brakonerlermen kúres jumystaryn júrgizýde de munyń kómegi orasan dep oılaımyn, - dedi Ekologııa, geologııa jáne tabıǵı resýrstar mınıstri Maǵzum Myrzaǵalıev.
Jyl saıyn elimizde kıikter popýlıasııasynyń memlekettik esebi áýeden júrgiziledi. Áýe tehnıkasyn jaldaý men qoldaný qymbat bolǵandyqtan, keı aýmaqtardy júıeli kúzetý jáne kıikterdiń monıtorıngisin qosymsha júrgizý múmkin bolmaı kelgen edi. Ushqyshsyz ushý apparattary paıda bolǵaly derek jınalatyn aýmaqtyń shekarasy keńeıip, zertteý ádisteri kóbeıdi.
Supercam S350 ushqyshsyz ushý apparaty osy klasstaǵy eń tehnıkalyq sıpattamasy jaqsy tehnıka. Ol saǵatyna 140-150 shaqyrym jyldamdyqpen usha alady. Úzilissiz 4-5 saǵat boıy kókte qalyqtap júre beredi. О́zi ushyp ótken jerdegi ózgeristerdi, jan-janýarlardy, ózen-kólderdi foto men vıdeoǵa túsirip, mamandarǵa jiberip otyrady. Telemetrııa men beıneqabyldaǵyshty basqarýǵa arnalǵan jerdegi antennalar blogy osy úshin qajet. Apparat 70 kılometrden astam qashyqtyqta da áreket etý radıýsyn toqtatpaıdy. Munda janýarlardy sanaýǵa arnalǵan avtomattandyrylǵan baǵdarlamalyq qamtý júıesi de bar eken.
Sýretterdi túsirgen avtor.
