«Botaqara» spektaklinde 17-18 ǵasyrlardaǵy qazaq-jońǵar arasyndaǵy shaıqas, qazaq jerin syrtqy jaýdan qorǵaýdaǵy batyrlar erligi baıandalady. Baıanólgılik avtor Áskerhan Aqtaıdyń bul shyǵarmasyn teatrdyń bas kórkemdik jetekshisi Álııa Baımahan sahnalady.
Ekinshi shyǵarma «Muńmen alysqan adam» spektakli jer betinde tarydaı shashylǵan qazaqtardyń taǵdyry baıandaıdy.
«Botaqara» qoıylymyndaǵy Botqara – Jońǵar shapqynshylyǵy kezinde Balqash mańyn jaýdan qorǵap qalǵan batyr, ómirde bolǵan adam. Qazir sol mańda Botaqara degen taý bar. Shyǵarmada Botaqara men Sheshenbıke degen qyrǵyz qyzy ekeýi qazaq-qalmaqtyń arasynda bitimgershilik ornatyp, syrtqy jaýǵa solaı toıtarys berýdi oılastyrady. Shyǵarmanyń, qoıylymnyń maqsaty tek atys-shabys ǵana emes, tatýlyqqa, bitimgershilikke úndeıdi. Keıde qazaq pen qalmaq ómir boıy tistesip ótken degen túsinik qalyptasqan. Biraq tarıhqa úńilsek dini bólek bolǵanmen turmysy uqsas eki halyqtyń soǵyssyz, tatý kezderi de bolǵan. Rejısser sheberliginiń arqasynda kólemdi qoıylym sahnaǵa yqshamdalyp shyǵaryldy. bar-joǵy on akter ǵana oınap shyqty», deıdi teatrdyń ádebıet bóliminiń meńgerýshisi Abylaı Maýdan.
Kórermender eki qoıylymǵa da rızashylyǵyn bildirdi. Sahna sheberligin jaqsy meńgergen qostanaılyq ártister Mońǵol elinen qurqol qaıtpady. Botaqara rolinde oınaǵan akter Asylan Kenjetaı jáne Sheshenbıke beınesin somdaǵan Móldir Qubash «Mońǵolııa mádenıet salsynyń úzdigi» tósbelgisimen marapattaldy.
«Mońǵolııa sapary tabysty boldy. Jastar jyly bolǵandyqtan bul joly sahnada negizinen jastar óner kórsetti, akterlerimiz abyroı biıiginen kórindi» deıdi teatr akteri, jastar ustazy Qonysbek Begaıdarov.
Qostanaı
