Úkimet úıinde ótken baspasóz májilisinde Ulttyq ekonomıka vıse-mınıstri Berik Sholpanqulov pen Memlekettik kirister komıteti tóraǵasynyń orynbasary Jaıdar Ińkárbaev «kóleńkeli ekonomıkany» azaıtý boıynsha atqarylyp jatqan jumystar men aldaǵy josparlar týraly esep berdi.
Mınıstr orynbasarynyń aıtýynsha, qazirgi tańda eldegi kóleńkeli ekonomıkanyń úlesi ishki jalpy ónimniń 30 paıyzyna deıin jetedi. Sonyń ishinde saýda men qurylys salasynda salyqtan jaltarýshylar kóp eken. Degenmen sońǵy jyldary kórsetkishtiń azaıyp kele jatqany baıqalady. Al 2025 jylǵa deıin kóleńkeli ekonomıkanyń úlesi Ekonomıkalyq yntymaqtastyq jáne damý uıymy elderiniń deńgeıinen, ıaǵnı ishki jalpy ónimniń 15-17 paıyzyna deıin tómendetý josparlanyp otyr. Bul úshin mınıstrlik birqatar bastamalardy qolǵa almaq. Atap aıtar bolsaq, elektrondy shot-faktýra aqparattyq júıesi taýarlardyń sońǵy tutynýshyǵa deıin qozǵalysyn baqylaýǵa múmkindik berse, vırtýaldy qoıma modýli arqyly avtomatty rejimde taýar qozǵalysynyń prosesin qadaǵalaýǵa bolady.
Zattaı qadaǵalaý boıynsha taýarlardy tańbalaý jumystary bastalyp ketken. Qanatqaqty jobanyń nátıjesinde teri buıymdary boıynsha tabys 1,5 esege ulǵaıǵan. Al qazir temeki men alkogol ónimderine osy ádis qoldanyla bastady.
Blokcheın tehnologııasy arqyly da qosylǵan qun salyǵyn baqylaý shotyn paıdalana otyryp QQS-ti ákimshilendirýdiń jańa ádisi engizildi. QQS baqylaý shotyn paıdalanatyn salyq tóleýshige qatysty qosylǵan qun salyǵyn qaıtarý kezinde salyqtyq tekserýler alynyp tastalady jáne qosylǵan qun salyǵyn qaıtarý merzimi 55-ten 15 jumys kúnine deıin qysqartyldy.
2020 jyldyń 1 qańtarynan bastap jappaı onlaın-baqylaý kassalyq qurylǵysyn qoldaný arqyly endi Memlekettik kirister komıteti reıdtik tekseristiń ornyna kameralyq baqylaý jasaıtyn bolady.
Sonymen qatar Eýrazııalyq ekonomıkalyq odaq aýmaǵy boıynsha Taýarlar tranzıtiniń biryńǵaı júıesi qurylmaq. Al Reseı Federasııasymen arada navıgasııalyq elektrondy plombalardy paıdalaný boıynsha qanatqaqty joba iske qosylmaq. Úshinshi elderden ımporttalatyn taýarlar túsiminiń 30 paıyzy Qytaıdan keletin ımportqa tıesili ekenin eskere otyryp, mınıstrliktiń Memlekettik kirister komıteti men QHR Bas keden basqarmasy ózara onlaın rejimde elektrondy aqparat almasý boıynsha kelisimge kelip jatyr.
«Taýarlardy tańbalaý, elektrondy shot-faktýra engizý, vırtýaldy qoıma jasaý, táýekelderdi basqarý júıesin qurý men onlaın-kassa engizý sekildi aqparattyq júıelerdi qoldanýdan úlken nátıje kútip otyrmyz. О́tkiziletin is-sharalar salyqtyq jáne kedendik ákimshilendirýdi sıfrlandyrýǵa, aqparattyq júıelerdi yqpaldastyrýǵa negizdelgen» degen B.Sholpanqulov taýarlardy qadaǵalaý júıesin qurý ekonomıkany kontrafaktilik ónimderden qorǵaýǵa da múmkindik beretinin aıtty.
Jalpy, joǵaryda aıtylǵan bastamalar iske asyrylatyn bolsa, aldaǵy jyly bıýdjetke qosymsha 800 mlrd teńge kiris kirmek. J.Ińkárbaevtyń aıtýynsha, qazirgi tańda «kóleńkedegi» kásipkerlerdiń kesirinen el bıýdjeti jylyna 2,5 trln teńgedeı kiristen qaǵylyp otyrǵan kórinedi.
