Jýyrda ǵana Jambyl aýdany, Jambyl aýyldyq okrýgine qarasty Qońyrtóbe eldi mekeninde bolǵan alapat órtten «Ǵalymjan» sharýa qojalyǵynyń tórt túligi otqa orandy. Tótenshe jaǵdaılar qyzmetiniń málimdeýinshe, órt elektr jelileriniń tuıyqtalýy saldarynan shamamen túngi saǵat 00-01 shamasynda tutanǵan. Tún ortasynda asqynǵan órt atalǵan sharýa qojalyǵynyń jalpy 90 bas malyn sharpyǵan. Atap aıtsaq, qojalyq basshysy Nurlan Jumaǵulovqa tıesili 5 bas jylqy, 18 bas qoı jáne 67 bas sıyr maly túgeldeı órtenip ketken.
Kásipker mal sharýashylyǵymen talaı jyldan beri aınalysyp keledi eken. Jaqynda ǵana «Ǵalymjan» sharýa qojalyǵyn ashyp, ol munda mal bordaqylaýdy qolǵa alǵan. Alaıda tótennen kelgen tilsiz jaýdyń saldarynan mundaǵy barlyq mal basy tirideı janyp ketti. Qoranyń ár buryshynda jatqan maldyń óli denelerine qaraǵanda, janýarlardyń basy shynjyrmen myqtap baılanǵan. Elektr jelileriniń tuıyqtalýynan tutanǵan qyzyl jalynnyń ushqyny qamyspen jabylǵan qoranyń shatyryna tıip, odan mal turǵan jerge túsip, odan ári jaqyn mańǵa jınalǵan shópke túsken. Tún ortasynda tilsiz jaýmen arpalysýǵa shyqqan jumysshylar áýeli órtti ózderi sóndirmek bolypty. Alaıda sát sanap kúsh alyp bara jatqan órtti aýyzdyqtaý múmkin bolmaǵandyqtan, olar amalsyz qutqarýshylardyń kómegine júgingen. Sonyń ózinde 600 sharshy metr jerdi órt jaılaǵan.
Jambyl aýdany ákiminiń orynbasary Erlan Qydyráliulynyń aıtýynsha, jergilikti ákimdik bul máselege beıjaı qaramaı, tıisti kómek kórsetken. Qońyrtóbe eldi mekeninde bolǵan órtti sóndirý úshin aýdannan 20-dan astam adam jáne 5-6 tehnıka kúshi tartylǵan. Sonymen qatar sharýalarǵa medısınalyq qyzmet te kórsetilgen. Sonyń ózinde abaısyzda tutanǵan alapat jalynnyń beti 4 saǵattyq arpalystan soń áreń qaıtqan. Biraq ókinishke qaraı tórt túlik mal tilsiz jaýdyń qurbanyna aınaldy. Sondaı-aq 200 tonna shóp kúlge aınalǵan. Aýdan ákimdigi tarapynan ot tıip, opat bolǵan maldardyń óligin tolyǵymen oqshaýlap kómý jumystary júrgizildi. Ákimniń orynbasary taǵy da tıisinshe kómek kórsetiletinin aıtty.
Jambyl oblysy
