Ras, Qarlyǵash apańyz birneshe kórpeni qurap tastapty. Mata qıyndylaryn qııýlastyryp, tartymdy dúnıe shyǵarǵan sheberligine qaıran qaldyq. Munda neshe túrli qazaqı naqyshtaǵy oıýlardan, órnekterden quralǵan kórpeler kózdiń jaýyn alady. «Nemerelerimniń boqshasyna jaraıtyn shyǵar», deıdi kúle sóılegen baıyrǵy ustaz rıza keıipte.
– Meniń sheshem Qanshaı da ismer kisi edi. Lezde bir kóılekti tigip, toıǵa kıip bara jatsa, qydyryp kelisimen qolǵap, shulyq toqyp nemereleriniń jyly júrýin qadaǵalaıtyn. Keýdeshe toqý, tumaq tigý ol kisi úshin tańsyq emes edi, – deıdi osy úıge qydyrystap kelgen qudaǵıy Orynkúl de qoshtaı sóılep.
Jańaqorǵan aýdany, Qandóz aýylyndaǵy orta mektepte birneshe jyl ustazdyq etip, keıinnen mektep dırektory laýazymynan zeınetkerlikke shyqqan Qarlyǵash Bekmuhanbetova tól ónerimizdi kúndelikti mashyǵyna aınaldyryp, nemerelerine úıretip keledi.
– Qımylsyz qarap otyrý – ómirdiń mánin ketiredi. Aýyra bastaısyń, basqalardyń mazasyn alasyń. Sondyqtan qımylsyz qarap otyrý men úshin tozaqpen birdeı. Byltyrdan beri jas kezimde biraz serik etken tiginshilikke qaıta bet burdym. Úıde túrli matalardyń qıyndylary men jyrtystary jıylyp-aq qalǵan eken, solardy birtindep kádege jaratýdamyn, – deıdi ol.
Kóneniń kózin kórgen ismer ustazdyń aıtýynsha, tiginshilik tegin óner emes. Ol qyz balany tózimdilikke, únemdilikke, sheberlikke, boıaýlardy ajyratyp, olardyń bir-birimen úılesimdilik tabýyn túsinip, tanýǵa shyńdaıdy, tazalyqqa, ásemdikke úndeıdi, jan-dúnıesin baıytyp, oı-órisin keńeıtedi. Muny qolynyń ep-sebi bolýmen qatar ónerge beıimi bar, qııaly ushqyr jan kelistirip atqara alady. Boıaý túrleriniń úılesimdiligin de jete bilgen jón. Sándi tústerdiń bir-birimen jarasym taýyp, ádemilik álemine ıirýi kóńilge shattyq ornatady desek artyq emes. Ol arqyly halqymyzdyń qunarly dúnıetanymyn, estetıkalyq talap-talǵamyn, sulýlyqty ańsaǵan ińkár sezimin aıtqyzbaı-aq tanısyń.
Nurmahan NAZYMHANULY
Qyzylorda oblysy,
Jańaqorǵan aýdany,
Qandóz aýyly
