Gáp jaramsyz joldardyń jyry taýsylmaı otyrǵanynda. Aqtóbe oblysyndaǵy jergilikti mańyzy bar avtomobıl joldarynyń uzyndyǵy – 5052 shaqyrym. Onyń ishinde oblystyq deńgeıde – 1269 shaqyrym, aýdandyq deńgeıde 3789 shaqyrym jol bar. Qazirgi derekter sonyń 47 paıyzy jaramsyz ekenin kórsetedi. Bul – 2663 shaqyrym jol aty bar da, zaty joq, júrýge múldem kelmeıtin, oıylyp qalǵan shuńqyrlar degen sóz.
Aqtóbe oblystyq jolaýshylar kóligi jáne avtomobıl joldary basqarmasynyń bas mamany Erlan Jubatovtyń aıtýyna qaraǵanda, 2019 jyly 284,9 shaqyrym jergilikti mańyzy bar joldy jóndeý josparlanǵan. Eger bul is ýaqytynda atqarylsa, oblystaǵy jaramdy joldar kólemi úsh paıyzǵa kóterilmek. Bul boljanatyn qarqynnyń tym tómendigin kórsetedi. Osyndaı tasbaqa júristi eseptegende, 2030 jyldan keıin ǵana jergilikti joldardyń toqsan paıyzyn jaramdylyq deńgeıine jetkizýge bolady eken.
Árıne bul ázirge jospar ǵana. Osy ýaqyt aralyǵynda kózdegen meje alyna ma, joq pa? Oǵan eshkim kepildik bere almaıdy. Eger jóndelse, jaramdy joldardyń kólemi nebári úsh paıyzǵa ǵana kóterilmek. Sonda mundaı ógiz aıańmen jergilikti merdigerler bul isti qashan tyndyrmaq?
Aıtalyq, Pokrovka – Temir – Kenqııaq – Embi aralyǵyndaǵy joldyń 111-175 shaqyrymy tozaqtyń ózi deýge bolady. Munda bir shuńqyrdan qashamyn dep júrip úsh shuńqyrǵa tap bolýyńyz ábden kádik. Qobda men Mártók aýdandarynyń ortalyǵyn jalǵaıtyn 82 shaqyrym joldyń jaǵdaıy da osy derekten asyp ketpeıdi.Sondaı-aq óńirde Aqtóbe – Rodnıkovka – Mártók aralyǵyndaǵy 88 shaqyrymdyq avtomobıl jolynyń jergilikti mańyzy joǵary desek, bul baǵytta da jaıbasarlyq pen jaıbaraqattyq kórinisteri aldan shyǵady. Oblystaǵy osyndaı jaramsyz joldardyń tizimin odan ári jalǵastyra berýge bolady. Áıtse de budan esh nárse ózgere qoımaıtyny taǵy da aıan.
Qysqasy, búginde Aqtóbe aımaǵyndaǵy jyrym-jyrymy shyqqan joldardy retke keltirý úshin jańasha kózqaras pen sony serpilis qajet. О́ńirde aýdandyq jáne oblystyq mańyzy bar joldar qurylysyn salý úshin ishki ınvestısııalyq qarajattar tartý isiniń deńgeıi de kóńil qanaǵattandyrmaıdy. Jergilikti ókiletti organdar máseleniń osy tusyna tereńirek kóńil aýdarsa deımiz.
AQTО́BE
