Is-sharaǵa qatysqan Nur-Sultan qalasy ákimi Altaı Kólginov Nazarbaev Ýnıversıtet stýdentteri men ujymyn aıtýly sharany uıymdastyryp otyrǵanymen quttyqtaı kelip, Qazaqstanda jas kóshbasshylar úshin úlken múmkindikterdiń týyp otyrǵanyn jetkizdi.
«Nur-Sultan – jańadan salynǵan jas qala. 90-jyldary eldegi daǵdarysqa qaramastan Tuńǵysh Prezıdentimiz Nursultan Nazarbaev elordany Almatydan Aqmolaǵa kóshirdi. Bul qıyn ári kúrdeli ózgeris bolatyn. Alaıda arada 20 jyl ótkende qalamyz kún sanap ósip kele jatqan iri megapolıske aınaldy. Qazir qalaǵa shetelden mıllıardtaǵan ınvestısııa aǵylyp, turǵyn úıler men áleýmettik nysandar kún sanap salynyp jatyr. О́zgeristiń úlkeni osy emes pe?!», degen qala ákimi myńjyldyqtardaǵy kóshpendi tarıhymyzdyń elordada kórinis tapqanyn tilge tıek etip, sheteldik qonaqtardy qalany tamashalaýǵa shaqyrdy.
Qalanyń ǵana emes, jalpy Qazaqstannyń úlken ózgeristerge umtylǵan jasampaz el ekenin aıtqan qala ákimi elde áleýmettik ósý men merıtokratııaǵa teńdessiz jol ashylǵanyn jetkizdi. «Mysaly, Tuńǵysh Prezıdent ashqan «Bolashaq» bilim berý stıpendııasy Qazaqstandaǵy kez kelgen bilimdi jáne eńbekqumar jastyń álemdegi eń úzdik ýnıversıtetterde bilim alýyna múmkindik beredi. Stıpendııanyń ásirese, aýyl jastaryna baǵyttalǵanyn eskersek, bul ózgeriske umtylý emeı nemene?», degen A.Kólginov Nazarbaev Ýnıversıtettiń de qazaq jastaryna álemdik deńgeıdegi bilim men tájirıbe usynyp otyrǵanyn jetkizdi.
A.Kólginov kásipkerlikpen aınalysamyn deýshilerge arnaıy ashylǵan túrli baǵdarlama men granttyń da Qazaqstanda talapty jasqa jaǵdaı jasalǵanynyń belgisi ekenin aıtty.
Sonymen qatar EKSPO-2017, Astana ekonomıkalyq forýmy sekildi iri halyqaralyq sharalardyń da jastardy qanattandyratynyn málimdedi. Al Prezıdent Q.Toqaevtyń bastamasymen ashylǵaly jatqan 300 adamdyq prezıdenttik kadrlyq rezervtiń de eldi úlken ózgeristerge jeteleıtinin jetkizdi.
Qala ákiminiń aıtýynsha, Elbasynyń bıylǵy jyldy Jastar jyly dep jarııalaýy da jańa býynnyń bolashaqqa degen senimin arttyra túsetini sózsiz.
Jyl saıyn Azııa men Tynyq muhıty elderiniń ár qalasynda ótkiziletin sharaǵa bıyl álemniń túkpir-túkpirinen 500-den astam delegat jınaldy. Olardyń arasynda halyqaralyq kompanııa basshylary, qoǵam qaıratkerleri, sonyń ishinde UNICEF Koreıa doktory Song San Hıon, Úndistannyń burynǵy syrtqy ister mınıstri Nırýpama Rao, Taıaý Shyǵys jáne Soltústik Afrıka naryqtary boıynsha Standard Chartered Bank burynǵy basshysy Denıel Assı, beıbitshilik úshin Nobel syılyǵy ıegeri Rae Kvon Chýng, dúnıejúzilik McKinsey ınstıtýtynyń dırektory Djonatan Votsel, World Bank Group tehnıkalyq dırektory Leslı Go sekildi tanymal tulǵalar bar.
