Josparǵa sáıkes bıyl el boıynsha 685 aýyldy qamtý josparlanǵan. Pavlodar oblysy boıynsha búginde 9 aýyldyq eldi mekenniń 36 mekemesi, onyń ishinde mektepter, aýrýhanalar, ákimdikter sapaly ınternetpen qamtamasyz etilgen.
«Aýyldardyń keń jolaqty ınternetke qoljetimdiligin qamtamasyz etý – aýqymdy ári biregeı joba. Bul Tuńǵysh Prezıdent – Elbasy Nursultan Nazarbaevtyń tapsyrmasy boıynsha «Sıfrly Qazaqstan» baǵdarlamasy aıasynda júzege asyrylýda. Aýyldarǵa júrgizilip jatqan telekommýnıkasııa ınfraqurylymy shalǵaıda ornalasqan eldi mekenderdegi áleýmettik sala nysandaryn, bıýdjettik uıymdar men memlekettik mekemelerdi joǵary jyldamdyqty ınternetpen qamtamasyz etedi. Sondaı-aq sıfrly qyzmetter men servısterdi engizý deńgeıin arttyrýǵa múmkindik beredi. Bilim berý, densaýlyq saqtaý jáne basqa da salalardy damytý esebinen halyqtyń ómir súrý sapasyn arttyrýǵa oń yqpal etedi», dedi Shaqat aýylyndaǵy orta mektepte júrgizilgen jumys nátıjelerimen tanysý barysynda Sıfrlyq damý, ınnovasııalar jáne aeroǵarysh ónerkásibi mınıstri Asqar Jumaǵalıev.
Vedomstvo basshysy sondaı-aq «Pavlodar» arnaıy ekonomıkalyq aımaǵyna jáne aımaqta ornalasqan iri kásiporyndarǵa, atap aıtqanda «Pavlodar munaıhımııa zaýyty» JShS, «Gıssenhaýs» JShS, Ekibastuz qalasyndaǵy «Prommashkomplekt» JShS jumystarymen tanysty. Bul kásiporyndarda sıfrly tehnologııalar, ekonomıkalyq tıimdilikke qol jetkizýge jáne óndiristi ońtaılandyrýǵa múmkindik beretin tehnologııalyq jáne bıznes-prosesterdi avtomattandyrý, tehnologııalyq proseske biriktirilgen ınnovasııalyq sheshimderdi qabyldaý belsendi túrde qolǵa alynǵan. Bilim berý salasyn sıfrlandyrý deńgeıin pavlodarlyqtar mınıstrge «Jas Daryn» mamandandyrylǵan mektebiniń mysalynda kórsetti. Sonymen qatar sıfrlandyrýǵa jaýapty vedomstvo basshysy «Azamattarǵa arnalǵan úkimet» KeAQ memlekettik korporasııasy fılıalynyń Halyqqa qyzmet kórsetý ortalyǵy men kóshi-qon qyzmeti ortalyǵynyń jumysyna erekshe nazar aýdardy. HQO-nyń jabdyqtalýyn qarap shyǵyp, óńirlik fılıaldaǵy áriptesterimen áńgimelesti. Sondaı-aq uzyn-sonar kezekterdiń týyndaýyna jol bermeý jáne HQO mamandarynyń sapaly ári tez qyzmet kórsetýi boıynsha qolǵa alynǵan sharalardyń tıimdiligin baǵalady.
Pavlodar oblysy
