Onyń aıtýynsha, mektepterdegi oqýshylar sany 70 myńǵa jýyqtap, 9 myńnan astamy birinshi synyp tabaldyryǵyn attamaq. Bala sanynyń azaıýyna baılanysty 7 bastaýysh mektep jabylyp, osynsha mektep negizgi jáne bastaýysh bilim oshaǵyna aınaldyrylǵan. Salany qarjylandyrý mólsheri 30 mlrd teńgeni qurap, 18 paıyzǵa ulǵaıǵan. О́ńirdiń áleýmettik-ekonomıkalyq damýynyń úsh jylǵa arnalǵan keshendi baǵdarlamasy sheńberinde 120 bilim ordasyn jóndeý belgilengen. Biraq qarastyrylǵan qarjy artylyp qalǵandyqtan taǵy 17 mektepti jóndeýge konkýrs uıymdastyrý uıǵarylǵan.
– Konkýrs jarııalanǵan soń tender erejesi boıynsha 30 kún memlekettik satyp alýlar saıtynda turýy tıis. Budan tysqary konkýrstyq sharttardy rásimdeýge 20 kún ketedi. Osy sebepti tizimge kesh qosylǵan mektepterdi jóndeý kesteden qalyp keledi.
Ǵ. Músirepov atyndaǵy aýdannyń eki mektebiniń oqýshylary oqýdy mádenıet úıinde jalǵastyratyn bolady, degen Gúlmıra Raıynbekqyzy Jambyl aýdany Kladbınka mektebinde oryn alǵan oqys oqıǵany túzetýdi qurylys mekemesi óz mindetine alǵanyn jetkizdi. Onda jańbyr jaýyp, shatyrǵa zaqym kelse kerek.
Mundaı oralymsyzdyqtar oblys ortalyǵynda da kezdesedi. Qalalyq bilim bóliminiń mamandary bes mektepte qurylys jumystarynyń kesheýildep otyrǵanyn aıtady. Ásirese, apattyq dep tanylǵan Qojabergen jyraý atyndaǵy №6 qazaq mektebinde jaǵdaı áli dabyl qaǵarlyq. Tender jyl basynda ótkizilip, qazynadan 98 mln teńge bólingenine qaramastan «Eńbek-Qyzyljar» kásiporny óz mindetin jumys kúshi, kásibı mamandary jetispeıtin qosalqy merdigerge arta salǵany baıqalady. Ata-analardyń shaǵymy boıynsha osynda bolǵanymyzda qurylysshylardan góri muǵalimderdiń kóptigi, merdigerdiń sylbyr qımyly saldarynan ustazdar qaýymynyń qolbala qusap jumysqa tartylǵanyn baıqadyq. Tań atqannan kesh batqanǵa deıin eden jýý, jıhaz tasý, basqa da usaq-túıek sharýalarǵa «jegilýine» qaraǵanda ádet bolyp ketken syqyldy. Álde Prezıdenttiń Tamyz keńesinde júktegen talaptarynyń óńirge qatysy joq pa? Memleket basshysy óz sózinde ustaz – árqashan ilim men izgilikti alǵa tartatyn tulǵa, ulaǵatty urpaq tárbıeleý – asa jaýapty ári kúrdeli jumys ekenin qadap aıtqan bolatyn.
«Merdigerlerdiń oralymsyzdyǵynan ýaqytymyzdy esh etip, salpaqtap júrgenimizge birneshe aı boldy. Alatyn jalaqymyz onsyz da mardymsyz. Qıt etse, mindetiń dep shyǵa keledi. Tym bolmasa 10-15 kún buryn tap-tuınaqtaı ázirlep qoısa, bir sári. Alǵashqy qońyraý merekesine úlgermek nıetpen asyǵyp-úsigip sapasyz salynyp jatqanyn bári kórip-bilip otyr. Áıteýir bitirse degen pıǵyl basym. Bizdiń bala-shaǵamyzdyń qamy, mektepke baratynyn kim oılaıdy? Keshke taman ákimdiktiń basshylary digirlep jetip keledi. Bári dırektorǵa, muǵalimderge ǵana qoja, bı. Júıkemizge ábden tıip bitti», dedi bizge aty-jónin atamaýdy ótingen jumysshylardyń biri. «Eńbek-О́skemen» qurylys kompanııasy da mımyrt júrisinen asa almaı keledi. Soǵan qaraǵanda qurylysy saǵyzdaı sozylǵan mektepter oqýshylardy qabyldamaq túgil etek-jeńin jınaı almaı qalýy múmkin. Daryndy balalarǵa mamandandyrylǵan «LORD» lıseıindegi jóndeý jumystary qazan aıyna deıin jalǵasýy ábden yqtımal.
Jyl ótken saıyn Qojabergen jyraý atyndaǵy mektepte oqýshylardyń sany kóbeıip, bilim berý úrdisin úsh aýysymda uıymdastyrýǵa májbúr. Tyǵyryqtan shyǵýdyń birden-bir joly – «Jas órken» shaǵyn aýdanynda qońyr kúzge taman paıdalanýǵa beriletin 900 oryndy mektepke kóshirý. Biraq mundaı qadamǵa jergilikti bıliktiń aıaq baspaýy, bastapqyda kóshiremiz degen qudaıy ýádesinen taıqyp ketýi túsiniksiz. Ata-analardyń endigi bar úmiti oblys ákiminde.
Qoldaryna qalaq ustap, qabyrǵa sylamasa da, qurylysshylardan bir mysqal qalyspaı júrgen ustazdar jóndeý jumystary shatqaıaqtap jatqan basqa mektepterde de az emes.
Soltústik Qazaqstan oblysy
