Balalardy sábı kezinen rýhanı qundylyqtarǵa baýlyp ósirý qajet ekenin aıtqan qala basshysy oqýshylardyń rýhanı damýyn jetildirý, ultjandylyqqa, mádenıetke tárbıeleý maqsatynda úshjyldyq «Ulttyq tárbıe tujyrymdamasyn» jasaýdy aıtty.
Sonymen qosa, ustazdyń mártebesi men bilimniń sapasyn kóterý jaıyn qozǵaǵan ákim eń aldymen mektep aınalasyn paıdakúnem bıznesmenderden aryltýdy atap ótti.
«Jasyratyny joq, mektep formasy jylda jańa oqý maýsymy bastalǵanda, úlken shýdyń basy bolyp keledi. Sebebi, bizdiń turmysymyzda áleýmettik shıelenister, jaǵdaıy tómen otbasylar bar ekenin jaqsy bilesizder. Mektep oqýshylarynyń formasy ár mektepte ár bólek. Mektepterdiń árqaısysy óz formasyn bekitip alǵan. Máselen, ata-ana úıiniń janyndaǵy lıseıge balasyn oqytqysy kelse, ol lıseıdiń oqýshy formasy tym qymbat turady. Áleýmettik narazylyq osyndaıdan týyndaıdy. Bul jerde mektep oqýshylarynyń da formasyn biryńǵaı júıege kóshirý kerek. Mektep formasyn bızneske aınaldyryp, aqsha tabýdyń kózi qylýdy doǵarý kerek»,-dedi E.Aıtahanov.
Konferensııa barysynda jańa oqý jylyna qoıylǵan mindetter men maqsattar baıandaldy. Shymkent qalasy bıylǵy 2019-2020 oqý jylyn 253 memlekettik, 445 jekemenshik bilim berý uıymdaryndaǵy 294 myńnan astam bilim alýshylarmen bastamaq. Sonymen qatar, bilim salasynda úzdik jetistikterge jetip, biliktiligimen erekshelengen birqatar ustazdar mınıstrliktiń jáne qala ákiminiń alǵys hatymen marapattaldy.
