Ol halqymyzdyń daralaryn tasqa til bitirip, músin ónerinde sýrettedi. Ásirese Almaty qalasyndaǵy Abaı, Shoqan, Taraz qalasyndaǵy Jambyl eskertkishteri ulttyq rýhanı aıbynymyz sekildi kórinedi. Qazaqtyń ulttyq kásibı músin óneriniń irgetasyn salǵan talantty músinshiniń ómirden ozǵanyna on jyl bolyp qalypty. Onyń shákirtteriniń biri Tileýberdi Bınashev músinshige eskertkish qoıylýy tıis ekenin ár jerde aıtyp júretin.
Hakimjan Esimhanuly – Qostanaı topyraǵynyń perzenti. Tobyl boıynda ósti. Qostanaı qalasynyń 140 jyldyq merekesi sheńberinde Hakimjan Naýryzbaevtyń jas músinshi Gúlfııa Meldesh jasaǵan tas beınesi oblys ortalyǵyndaǵy Pýshkın jáne Altynsarın kósheleriniń qıylysynan oryn aldy. Hakimjan Naýryzbaevty jáne onyń shyǵarmashylyǵyn biletinder músinniń óte tabıǵı jasalǵandyǵyn, ózine óte uqsaıtynyn birden baıqaıdy. О́mirde ulylyq pen qarapaıymdylyqtyń aǵaıyn ekenin dáleldep ketken músinshiniń oıly júzinen ol taǵy bir kesek týyndy jasaýǵa kirisetindeı seziledi.
– Qazaq óneri tuńǵyshtarynyń biri Hakimjan Naýryzbaev óziniń týǵan jeriniń tórinde turatyn boldy. Laıyǵy qashannan da osy edi. Endi oblys ortalyǵynda Hakimjan aǵanyń atynda kóshe bolýy tıis. Erekshe daryn ıesiniń esimi týǵan jerinde ulyqtalmasa, ol bárimizge de syn emes pe?! – dedi eskertkishtiń ashylý saltanatyna qatysqan belgili akter Asanáli Áshimov.
Eskertkishter qalanyń sáni ǵana emes, ol keıingi urpaqqa rýhanı azyq, patrıottyq tárbıe berýge qyzmet etedi. Táýelsizdik alǵan jyldardan beri Qostanaı qalasynda Ahmet Baıtursynovqa, Beıimbet Maılınge eskertkish, Shaısultan Shaıahmetovke, Kámshat Dónenbaevaǵa músin ornatyldy. Olardyń qataryn ataqty músinshiniń músini tolyqtyrdy.
QOSTANAI
