Bul qarajat byltyrǵydan úsh ese kóp. Qazir qural-jabdyqtardyń birqatary ornatylyp, qyzmet sapasynyń áldeqaıda jaqsarǵany baıqalady. Resmı málimetterge súıensek, 9 myń soltústik- qazaqstandyqtyń aǵzasynda qaterli isik bar. Naýqastar budan bylaı 140 mln teńgege Fınlıandııadan jetkizilgen sońǵy úlgidegi sıfrly mammograftyń kómegine súıene alady. Bul arqyly sút beziniń qaterli isigin bastapqy kezeńde birden anyqtaıdy. Burynǵy ýltradybystyq apparatpen sút beziniń jańadan paıda bolǵan isigin aıyrý óte qıyn-tuǵyn.
Onkologııalyq dıspanserdiń bas dárigeriniń orynbasary Oleg Dýdıaktyń aıtýynsha, obyr aýrýynyń taralýy jóninen oblysta kórsetkish joǵary. Onyń ishinde sút beziniń qaterli isigi keńinen taralǵan. Esepke eki myńnan astam áıel alynsa, 113-niń keseli bıyl anyqtalypty. Qondyrǵynyń kóp artyqshylyqtarynyń birine sút beziniń árbir mıllımetrin zertteıtin «tomosıntez» fýnksııasyn ataýǵa bolady.
Jýyrda óńir basshysy Qumar Aqsaqalov oblystyq eresekter aýrýhanasyna ornatylǵan zamanaýı kompıýterlik tomograftyń jumysymen tanysty. Onyń quny 347 mln teńge, 250 mln-y jergilikti qazynadan bólingen. Naýqastyń ish qurylysy aýrýlaryn óte dáldikpen zamatta aıqyndap beredi. Jáne de bir ǵajaby, AQSh-tan ákelingen qurylǵynyń dıagnostıkalyq qorytyndysyn álemniń kez kelgen jerine joldaýǵa bolady. Serverlik nusqadaǵy stansa arqyly úsh maman bir mezgilde zertteý júrgize alady. Aýrýhana dárigeri Ivan Leıman magnıttik-rezonanstyq tomograftyń ábden eskirgenin, jıi syna beretinin aıtyp edi, Qumar Irgebaıuly jyl aıaǵyna deıin jańasyn alyp berýge ýáde etti. Buǵan qosa zamanaýı angıograf ta alynady. Eski tomograf Taıynsha aýdandyq aýrýhanasyna berilip, Aıyrtaý, Aqjar, Ýálıhanov aýdandarynyń turǵyndaryna qyzmet kórsetedi.
«Densaýlyq saqtaý salasynyń materıaldyq-tehnıkalyq bazasyn nyǵaıtý, kadrlar tapshylyǵyn joıý baǵytynda júıeli sharalar atqarylyp keledi. Bıyl emdeý mekemeleri 66 jedel járdem kóligimen, 80-ge jýyq qural-jabdyqpen qamtamasyz etiledi. Kúzge taman 500 oryndy kópbeıindi aýrýhananyń qurylysy bastalady. Joǵary bilimdi 170 jas dárigerdiń kelýin tosyp otyrmyz. Olardyń jartysyna jýyǵy aýyldyq jerlerge ornalastyrylady. Eldi mekenge joldama alǵan mamandarǵa 1,5 mln, qalalyqtar úshin 500 myń teńge kótermeaqy tólenedi. «Dıplommen – aýylǵa! baǵdarlamasy aıasynda jasalatyn jeńildikter az emes. Qazir
47 páter daıyn», dedi oblys basshysy BAQ ókilderine bergen suhbatynda.
Soltústik Qazaqstan oblysy
