Karıkatýra janryn ońdy-soldy oınatatyn sýretshi bola tura A.Babıch ózin ártis, shoý júrgizýshisi dep esepteýge beıim turatynyn baıqadyq. Az-kem til qatysý barysynda ol dostyq ázilge qurylǵan sýretterdi bes mınýttyń ishinde salatynyn aıtty. Aqtóbege kelgende bul rekordyn 2 mın 30 sekýndqa deıin azaıtypty. Bul, árıne er adamnyń ázil sýretin salǵandaǵy ýaqyt.
Al endi onyń aldynda ádemi qyz-kelinshekter otyrsa, atalǵan úrdis 15-20 mınýtqa deıin sozylady eken. Keıde onyń boıaýyn ábden qanyqtyryp berýi úshin 4 saǵat ýaqytyn da sarp etetin kórinedi.
Bir korporatıvti keshte A.Babıch elý adamnyń ázil sýretin dopsha domalatyp tastaıtyn bolsa, Aqtóbede bul rekordyn taǵy da jańartyp, osy ýaqyttyń ishinde 60 ázil sýret salypty. Sonymen birge ýkraınalyq sýretshi Aqtóbege kelgende jergilikti bılik ókilderiniń ázil sýretterin salýdyń da yńǵaıyn keltiripti. Sonyń biri Aqtóbe qalasy ákiminiń orynbasary Aıgúl Arynǵazıeva desek, sýretshi onyń sýretin salý úshin qalalyq ákimdik ǵımaratynyń qarsy betindegi alańqaıǵa shaqyrypty. Ázil sýret qolyna tıgende vıse-mer oǵan renjimeı, kerisinshe fransýz aktrısasyna uqsatyp jibergeni úshin rızashylyǵyn jetkizgen.
Aqtóbelikter ýkraınalyq meımanǵa kádimgi qazaqsha et asyp, qonaqjaılyq kórsetti ári bul taǵamdy qolmen, ıaǵnı bes saýsaqpen alyp jeý kerektigin aıtqan kezde Anatolıı bul tilekti birden qup kórgeni de aıtýǵa turarlyq.
Kezdesý sońynda ýkraınalyq ázil sýretter salý isiniń maıtalmany sońǵy kezde maıly boıaýlarmen salynatyn tabıǵat kórinisteri men natıýrmort sekildi klassıkalyq sıpattaǵy sýretterdi salýǵa patsha kóńili aýyp júrgenin jetkizdi.
AQTО́BE
