Bul – ákimdiktiń qala turǵyndarymen jumysyn aıqyn kórsetetin, elordanyń belsendi turǵyndaryn, baqylanatyn qurylymdardy, jekemenshik kompanııalardy qalanyń tirshiligin qamtamasyz etý máselelerin sheshýde biriktiretin ortaq alań.
Akseleratordyń nazarynda astananyń árbir turǵynyn mazalaıtyn 3 mańyzdy másele tur. Bul – qoǵamdyq kólik, PIK qyzmeti jáne elordany sanıtarlyq tazalaý.
Baǵyttardyń árqaısysy boıynsha qalanyń aǵymdaǵy jaǵdaıyn jaqsartýǵa yqpal etetin biregeı sheshimderdi ázirleý jáne engizý, sondaı-aq alǵa qoıǵan maqsattarǵa 100 kúnde qol jetkizý kútiledi.
Qala ákim orynbasary Malıka Bekturova aıtyp ótkendeı, bul bastamanyń negizgi mindeti – qalalyq qaýymdastyqtyń ıdeıalary men usynystaryn, túıtkildi máselelerin birlesip sheshý.
«Biz qalalyq akseleratorlardyń halyqaralyq tájirıbesin qoldanamyz, oǵan aıqyn mysaldyń biri – Dýbaı qalasy. Bizde synaq rejıminde ákimdiktiń ókilderi, belsendi qala turǵyndary jáne qoǵamdyq uıymdardan qurylǵan shtab jumys isteıdi, ol akseleratordyń búkil jumysyn júıelendiredi jáne baılanystyrady», - dedi Malıka Bekturova.
Akseleratordyń jumys nátıjeleri arnaıy www.nursultansmartaccelerator.com saıtynda jáne Smart Astana mobıldik qoldanbasynda jarııalanatyn bolady.
