Ádebı keńistikke qozǵalys alyp kelgen bul konferensııanyń Almatyda ótýine sebepshi bolǵan – Ánýar Álimjanov edi. Onyń tóraǵalyǵy tusynda ádebı-mádenı baılanystar qarqyndy damyǵan bolatyn. Ál-Farabıdiń 1100 jyldyǵy Tashkentte toılanǵaly turǵanda Máskeýge baryp, Qonaevty araǵa salyp júrip, mereıtoıdy Almatyda atap ótkizgen de Álimjanov edi.
Osyndaı konferensııa, forým týraly keı adamdar «Onyń bári nege kerek? Bereri ne?» degen sarynda suraqtar qoıyp jatady. Bul rýhanı taıyzdyq. Mundaı sharalar ádebıetti tutastyrady hám jaqyndatady. Shabytyna shabyt qosady. Shynyn aıtsam, sol jıyn shyǵarmashylyq ómirimizge úlken rezonans alyp keldi. Onymen qosa órkenıetti elderge, ıaǵnı jan-jaǵymyzǵa qaraýdy úıretti. Jalpy ádebıette álemdik taqyryp degen bar, qazaq taqyryby degen bolady. Sol konferensııada biz álemge, jahanǵa kóz tiktik.
Ashylý saltanatynda palestınalyq aqyn Mýın Bsısýdyń minberge shyǵyp sóılegen sózi erekshe esimde qalypty. Ol óz zamanynyń revolıýsııasyn jyrlaǵan minezdi aqyn edi. Sol tusta Máskeýden kitaby shyǵyp jatqan. Qysqasy, uly dúrmektiń qazaq qalamgerlerine áseri kóp boldy. Qalıhan Ysqaq jazýshylardyń anda-munda qatynaýyna kólikterdi rettedi. Al Sherhan Murtazadan ashanaǵa kiretin talon alatynbyz. Keıin toı tarqaǵan soń Ramazan Toqtarov: «Sherhan – taýsylǵan talon, Qalıhan – jeli shyqqan balon», dep anekdot shyǵarǵan-dy.
Dýlat ISABEKOV,
jazýshy, dramatýrg, Memlekettik syılyqtyń laýreaty
