Is-sharany júrgizgen Jazýshylar odaǵy Nur-Sultan qalalyq fılıalynyń dırektory Dáýletkereı Kápuly:
– Saryarqanyń saıyn dalasyn dúbirletken kindik Azııanyń qarashańyraǵy – Qazaq eli kesheden beri Azııa elderi qalamgerleriniń forýmyn ótkizip jatyr. Búgingi is-shara qazaq rýhanııatyna, aqyn-jazýshylarǵa joǵary deńgeıde kóńil bólinip jatqanynyń aıǵaǵy», – deı kele, sóz kezegin qala ákiminiń orynbasary Baqtııar Mákenge berdi.
Nur-Sultan qalasy ákiminiń orynbasary Baqtııar Máken jınalǵan qonaqtardy – qazaqtyń marǵasqa qalamgerlerin qala basshysy atynan merekelerimen shyn júrekten quttyqtap, shyǵarmashylyq tabys tiledi.
Sondaı-aq óz kezeginde sóz alǵan Oljas Súleımenov pen Ulyqbek Esdáýlet te áriptesterin aıtýly is-sharamen quttyqtap, izgi tilegin jetkizdi.
Nur-Sultan qalasy Tilderdi damytý jáne muraǵat isi basqarmasynyń basshysy Tileýǵalı Qyshqashbaevtyń aıtýyna qaraǵanda, elordanyń Saryarqa aýdanynda ornalasqan alleıaǵa «Qalamgerler alleıasy» degen ataý berýdi usynǵan.
Eske sala ketsek, «Qalamgerler alleıasy» Azııa qurlyǵynda ornalasqan elder arasyndaǵy ádebı-mádenı baılanystardy nyǵaıtý, odan ári damytý hám egemendi elimizdiń búgingi keskin-kelbetin, Qazaqstannyń ádebıetin, rýhanı qundylyqtaryn dáripteý, ádebı úderistiń damýyna qatysty Azııa elderimen tájirıbe almasý maqsatynda Qazaqstan Jazýshylar odaǵy, Prezıdent Ákimshiliginiń jáne Mádenıet jáne sport mınıstrliginiń qoldaýymen ótip jatqan Azııa elderi qalamgerleriniń I forýmy aıasynda Nur-Sultan qalasynda ashyldy.
Qazirgi tańda alleıaǵa arnaıy eskertkish taqta ornatyldy. Eskertkish taqta bilimdi, danalyqty, shyǵarmashylyqty bildiretin ashyq turǵan kitap beınesinde berilgen. Eskertkish taqta bıiktigi – 150 sm, eni – 165 sm.
