Elbrýs taýyn baǵyndyrý úshin 30 qazaqstandyq Oral qalasynan tamyz aıynyń 28-i kúni jeńil kólikpen attanǵan. Kabardın – Balqar respýblıkasyna jetkennen keıin olar áýeli Chegem taýyna, keıin «105-nshi pıket» shyńyna shyǵyp, klımatqa beıimdelý sharalarynan ótken.
– Alǵashqy kúnderi araǵa kún salyp, tynyǵyp, 3000 metrdiń shamasyndaǵy bıiktikterge shyǵyp, keri túsip jattyǵyp júrdik. Taýǵa shyqqan úshinshi kúni tobymyz 5100 metr bıiktikke kóterildi. Osy kún áýesqoı alpınısterdiń kóbine qıyn soqty. Aýa qysymynyń qatty bolýynan júrek aıný, loqsý bastaldy.
Taýdyń shyńyna shyǵýǵa 10 saǵattyń ústinde ýaqytymyz ketti. Komandanyń 13 múshesi ǵana bul bıikke jetti. Elbrýsty baǵyndyrýdaǵy basty maqsatym – ózimdi synap kórý boldy, – deıdi Isataı Temirbaev.
Aıta keteıik, Isataı Temirbaev – salamatty ómir saltyn ustanatyn jandardyń biri. Oral qalasyndaǵy «UralskRuns» júgirýshiler tobynyń múshesi retinde túrli marafondarǵa da turaqty qatysyp turady.
Baýyrjan ShIRMEDINULY,
Batys Qazaqstan oblysy,
Syrym aýdany
