Kóz ushynda etegin máńgi jasyl qaraǵaılar men qoldyń salasyndaı aq qaıyńdar kómkergen Býrabaıdyń beınesi. Uıysa ósken qalyń ormannyń qyratqa órlegen tusynda Saryarqanyń samal jelimen terbelgen bıshi qaıyńdar bılep tur. On san túrli boıaý. Álde odan da kóp pe eken? Tylsym tabıǵattyń tunyǵyn sol qalpynda qotaryp alyp, kenepke kóshirgendeı.
Sýret óneri shyn máninde qudiret-aý! Qazaq dalasynyń kórkem pushpaǵyn kelisti sýretten kórgende júrek shymyrlap ketedi eken. Halyqaralyq forýmǵa birinen biri ótken, kileń saıdyń tasyndaı sýretshiler jınalypty. Koreıa, AQSh, Gollandııa, Qyrǵyzstan, Germanııa, Túrkııa, Vetnam, Reseı, О́zbekstan elderiniń sýretshileri. Mundaǵy negizgi maqsat – ata-babamyz aq naızanyń ushymen, aq bilektiń kúshimen qorǵap qalǵan kıeli jerlerdi beıneleý óneri arqyly barsha álemge tanytý.
Qazaq topyraǵyna tabany tuńǵysh ret tıgen amerıkalyq sýretshi Alan Skalaski kórikti óńirdiń kórkem beınesi Amerıkanyń soltústik óńirlerin eske salady deıdi. Bálkim sondyqtan da etene jaqyn tárizdi. Nıý-Djersı shtatynda dúnıege kelgen 26 jastaǵy sýretshiniń Qytaı elinde oqyp júrgenine úsh jyl bolypty. Al sýret óneri es bilgeli jan júregin baýraǵan dúnıesi.
– Nur-Sultan qalasynan Býrabaıǵa sapar shektik. Joldyń qos qaptaly janaryń jetpes keńistik. Ne degen mol dúnıe?! Amerıkanyń soltústik-batys, soltústik-ortalyq bóliginde dál osyndaı kórinisti kórýge bolar edi. Tipti mynandaı kórkem kórinisti sýret tiline kóshirý sýretshige de ońaı shyǵar. Nazar salyp qarasańyz, qanshama qanyq boıaý, anyq keskin menmundalap turǵan joq pa? Forým aıasynda tórtkúl dúnıeniń tórt buryshynan kelgen sýretshilermen tanysyp, pikir almasyp, tyń aqparat alýǵa múmkindik týdy. Osynyń ózi óte paıdaly dúnıe, – deıdi Alan Skalaski.
Al Germanııadan kelgen tanymal sýretshi Hettık Robert Tájikstanda dúnıege kelgen eken. Qazaqstannyń jaıymen etene tanys.
– 2005 jyly Berlınde ótken kórmege qazaqstandyq sýretshilermen birge óz týyndylarymdy qoıǵan bolatynmyn. Keıin de san márte kórmelerde kezdesip júrdik. Germanııada qazaq elshiliginiń ǵımaratyndaǵy eki úlken qabyrǵadaǵy qazaq dalasynan syr shertetin tarıhı sýretterdi salýǵa atsalystym, – deıdi sýretshi.
Aımaqaralyq mádenı baılanysty nyǵaıtyp, týrızmdi damytý úshin asa qolaıly óńir sanalatyn Býrabaı kýrortynyń mártebesin arttyrýdy kózdeıtin forýmnyń basty maqsaty kórikti jerlerdi sýret tilimen aıshyqtaý ǵana emes, ónegege toly baı tarıhymyzdy bar álemge tanytý.
Forým nátıjesinde ár sýretshi óziniń eki týyndysyn oblys jurtshylyǵyna tartý etpek. Sońǵy túıin «Kókshetaý» mádenıet saraıynda ótetin qorytyndy kórmede túıilmek. Endi álem jurtshylyǵy elimizdiń ótkeni men búginin, ajarly beınesin, bazarly bolashaǵyn barshaǵa uǵynyqty sýret tili arqyly túısinip, tanıtyn bolady.
Aqmola oblysy
