О́skemende otandyq ónimdi qoldaý boıynsha dóńgelek ústel ótti. О́ńirdegi iri óndiris orny «Qazsınk» kompanııasy uıymdastyrǵan sharaǵa jergilikti kásipkerler qatysty. Jıyrma myńnan astam adam eńbek etetin kásiporynda qyzmetkerlerge kerekti arnaıy kıimder men kúndelikti jumystaryna qajet jeke qorǵanys quraldary únemi suranysqa ıe. Alpaýyt óndiris orny osy maqsatta jergilikti taýar óndirýshilermen kelisimshart jasasady. «Biz kenshilerdiń jumysyna qajet bylǵary belbeýler shyǵaramyz. 2003 jyldan beri «Qazsınk» kompanııasymen yntymaqtastyqta jumys istep kelemiz. Jylyna 1 jarym myń belbeýdi satyp alady. Shaǵyn kásipornymyzda 8 adam jumys isteıdi. Iri kásiporyndarmen jumys isteý bizdiń bıznesimizdiń damýyna serpin beredi» deıdi Semeıden kelgen jeke kásipker Jasan Rahımov.
Kásiporynda merdigerlermen jumys isteý úshin qazaqstandyq mazmundy damytý keńsesi ashylypty. «Qazaqstandyq ónimdi qoldaý baǵytynda bizdiń kompanııa jyl saıyn otandyq taýar óndirýshilermen kelisim jasaıdy. Búgingi kúni taýarlardy satyp alý, qyzmet kórsetýge qatysty jasalǵan memorandýmdardyń jalpy somasy 307 mıllıard teńgeni quraıdy. Sonymen qatar 2016 jyly otandyq taýar óndirýshilerdi qoldaý maqsatynda Investısııa jáne damý mınıstrligimen tehnologııalyq kelisim jasaldy. Máselen, jeke qorǵanys quraldary men arnaıy kıimderdi alsaq, onyń 94 prosenti qazaqstandyq fırmalardan alynady» deıdi «Qazsınk» JShS ákimshilik máseleler jónindegi atqarýshy dırektory Andreı Lazarev.
О́SKEMEN
