Qoǵam • 20 Qyrkúıek, 2019

BQO-da 1094 otbasy AÁK alý úshin tabysyn jasyrýǵa tyrysqan

50 retkórsetildi

Batys Qazaqstan oblysynda (budan ári – BQO) 2516 otbasynyń ataýly áleýmettik kómek (budan ári – AÁK) alýynyń zańdylyǵy tekserildi, onyń ishinde 586 otbasyna  tólem ýaqytsha toqtatylǵan bolsa, taǵy 508 otbasyna tólem múldem tólenbeıtin boldy. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.

Oblystyq Jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Qaıyrǵalı Nadyrǵalıev BQO turǵyndarynyń áleýmettik qyzmet qyzmetkerlerin aldaýynyń óreskel faktileri týraly habarlady. Onyń aıtýynsha, AÁK taǵaıyndaý kezinde eń kóp taralǵan buzýshylyq naqty tabystardy jasyrý bolyp tabylady

«Osylaısha, Oralda alty balanyń anasy ótken jyldyń jeltoqsan aıynan bastap AÁK ala bastady. Áleýmettik kómek alýdyń zańdylyǵyn tekserý barysynda biz otbasynyń naqty tabysynyń jasyrylǵanyn anyqtadyq. 2018 jyly jeke kásipker retinde tirkelgen otaǵasynyń 6 mıllıon 904 myń 550 teńge kólemindegi tabysyn jasyrǵan. Aǵymdaǵy jyldyń birinshi jartyjyldyǵyndaǵy salyq esepteri boıynsha otbasynyń tabysy 3 mıllıon 877 myń teńgeni qurady. Qaıta esepteý nátıjesinde otbasyna AÁK tóleýden bas tartyldy», – dedi Qaıyrǵalı Nadyrǵalıev.

Osyǵan uqsas jaǵdaı Jańaqala aýdanynda da oryn aldy. О́tken jyldyń sáýir aıynda Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasy aıasynda ótinish berýshiniń qaıyn atasy 5 mıllıon 200 myń teńge kóleminde kredıt alyp, ol qarajatqa 17 iri qara mal satyp alǵan.

«О́tinish berýshiniń birge turyp jatqan qaıyn atasy jeńildetilgen kredıtke satyp alǵan iri qara maldy kórsetpesten otbasynyń naqty tabysyn jasyrǵanyn eskere otyryp, oǵan 1 mln 530 myń 612 teńge kóleminde AÁK tóleý toqtatyldy. Sáýir men mamyr aılarynda 255 myń 100 teńge kóleminde tólengen qarajat bıýdjetke qaıtaryldy», – dedi Nadyrǵalıev.

Aǵymdaǵy jylǵy 16 qyrkúıektegi jaǵdaı boıynsha BQO-nyń 59 myń 566 turǵyny nemese 11 myń 778 otbasy 3,7 mlrd teńge kóleminde AÁK aldy.

Esterińizge sala keteıik, AÁK taǵaıyndaý men tóleýdiń durystyǵyn monıtorıngteý nátıjesinde 72 myńnan astam ataýly áleýmettik kómek alýshy tabysy týraly jalǵan aqparat bergeni anyqtaldy.

Osyǵan baılanysty Mınıstrlik ákimdiktermen birlese otyryp, árbir anyqtalǵan fakti boıynsha, buzýshylyqtarǵa jol bermeý jáne «Memlekettik ataýly áleýmettik kómek týraly» QR Zańyn buzyp zańsyz taǵaıyndalǵan tólemderdi qaıta qaraý boıynsha jeke-jeke jumys júrgizýde. Bul baǵyttaǵy jumys jalǵasyp jatyr.

Sońǵy jańalyqtar

Abaı jáne Marjanı dúnıetanymy

Rýhanııat • Keshe

Uqsas jańalyqtar