Reformalar oza shabýdy kótermeıdi

Bul baılamǵa saılaýaldy baǵdar­la­ma­synda qoıylǵan máselelerge baılanysty kelip otyrmyz. Prezıdent eldi odan ári damytý men memleketimizdiń bolashaǵyna qatysty qadaý-qadaý máse­lelerdi atap kórsetkeni belgili. Búgin­gi kún bıiginen kóz salǵanda saılaýaldy platformada qoıylǵan mindetter ózi­niń múmkindigine qaraı oryndala basta­ǵa­ny­na kýámiz.

«Men halyqqa bergen ýádemdi min­det­ti túrde oryndaımyn», dep málim­dedi Qasym-Jomart Kemeluly Qazaq­stan halqyna arnaǵan Joldaýynda. Bul Memleket basshysynyń aq adal shyn sózi, júreginiń qalaýy ekeni anyq. Kez kelgen memlekette saıası reformalardy júzege asyrýdyń tek ózine tán ıirimderi men erekshelikteri bolatyny belgili. Mundaı jaǵdaıda asyǵyp, aptyǵyp alǵa oza shaýyp ketýge de, orynsyz aıaldap, maltyǵyp qalýǵa da bolmaıdy. Osy jaıtty Parlament palatalarynyń birlesken májilisinde Q.Toqaev oryndy eskertti degen oıdamyz. Bul kez kelgen qoǵamdyq qubylystyń iske asýynyń óz ýaqyty bolatyndyǵyn tereń túısinýden týyndaǵany sózsiz.

Saıası reformalardy iske asyrý kezinde naqty nátıjeler men jetis­tik­terge jetýdiń basty bir tetigi – azamattyq qoǵamdy damyta otyryp, onyń tolyqqandylyǵyn qamtamasyz etý bolsa kerek. Oǵan eń aldymen aza­mat­tyq jáne qoǵamdyq únqatysýlar arqy­ly qol jetkizýge bolatynyn atap kórsetti Memleket basshysy Qazaqstan hal­qyna arnaǵan Joldaýynda. Bul kóshe­de baıbalam salyp, aıqaı-shý kóterý sekildi arzan saıası upaı jınaýǵa árekettenýshilerdiń is-qımyldarymen múldem syıyspaıtyn syndarly aza­mat­tyq ustanymǵa jeteleıdi.

Sondaı-aq Prezıdenttiń elimizde kóppartııalyq júıeni odan ári damytý joldaryn usynǵany da qoǵamdyq-saıası ómirdiń búgingi talaptarynan týyndaıtyn qadamdar deýge bolady. Azamattyq jáne qoǵamdyq únqatysýlardyń basty baǵyty ashyqtyq pen jarııalylyqqa arqa súıegen jaǵdaıda ǵana mándi bol­maq. Memlekettik organdardyń aza­mat­tardyń aryz-shaǵymdary men ta­lap-tilekterine túsinistikpen qulaq asýynyń qajettiligi de osynda. Munyń ózi qoǵamdyq kelisimdi nyǵaıtý men el birligin eńselendirýge septigin tıgize alatyn tutqanyń biri. El birligi týraly áńgime qozǵaǵan kezde qazaq halqynyń memleket quraýshy ult retindegi orny aıqyn kórinis tabýy tıis. Sonymen birge aldaǵy ýaqytta memlekettik til – ultaralyq qarym-qatynas tili márte­besine jetýi kerektigi jónindegi júrek­jardy pikir de Prezıdent aýzynan aıtyldy. Osy oraıda bul iste basty jaýapkershilikti memleket quraýshy ult arqalaıtyny nazardan tys qalmasa eken degim keledi.

Eń bastysy, jyldyń basty qujaty elimizdiń saıası-ekonomıkalyq jáne má­denı-turmystyq baǵyttaryn, onyń sheshimin tabýǵa tıisti ózekti máse­le­le­rin tolyqtaı qamtı alýymen qundy demekpiz.

Roman RAHIEV,

Aqtóbe oblystyq densaýlyq saqtaý salasy qyzmetkerleri ardagerler keńesiniń tóraǵasy