Al «NFC Kazakhstan» JShS ókili Jarqyn Turyshevtiń aıtýynsha, kompanııa elimiz boıynsha múmkindigi shekteýli jandarǵa 20 mıllıon teńgege kómek kórsetken. Seriktestik óńirdegi jumyspen qamtýdy úılestirý jáne áleýmettik baǵdarlamalar basqarmasymen tyǵyz baılanysta jumys isteýde.
Bıyl ámbebap «umbrella» polıak fırmasynyń úsh arqalyǵy bar arbasyn, eresekterge arnalǵan bir júris arbasyn, bir vertıkalızator jáne serebraldy sal aýrýymen aýyratyn balalarǵa arnalǵan reseılik «Mega Optima» fırmasynyń bekitkishi bar bes júris arbasyn birlesip 2 mıllıon teńgege satyp alǵan. Sondaı-aq kompanııa óńirdegi kópbalaly otbasylardyń tizimin alyp, aldaǵy ýaqytta olardyń mektepterde oqıtyn ul-qyzdaryna qaıyrymdylyq jasamaqshy.
– О́kinishke qaraı, múmkindigi shekteýli jandardyń arnaıy jeke arbalarǵa muqtajdyq máselesi áli de bar, – dedi oblys ákimi Bolat Baqaýov arbalardy tapsyrý kezinde. – Bıýdjetten qarajat bólip, qajetti arbamen qamtamasyz etýdemiz. Bıznes te shet qalmaýda. «NFC Kazakhstan» kompanııasy jyl saıyn demeýshilik jasaıdy. Kompanııa basshylyǵyna alǵysymyzdy bildiremiz.
Joǵaryda atalǵan basqarmanyń málimetinshe, arnaıy qurylǵylardy ózdiginen satyp alý qıyn. Bir arqalyǵy bar arba – 200 myń teńge, bekitkishi bar júris arbasy – 80 myń teńge, al qolaılylyǵy joǵary keıbiriniń baǵasy 400 myń teńge turady.
– Ulym Baýyrjan sal aýrýymen aýyrady. О́zi otyra almaıtyndyqtan, arqalyǵy bar arba qajet boldy. Ákimdikke ótinish jazyp, kezekke turdyq. Búgin óte qýanyshtymyz. Bizge «umbrella» arbasy berildi. Oblys ákimine jáne demeýshilerge alǵysymdy bildiremin, – dedi ekibastuzdyq Gúlnur Nurhaeva.
Bıyl 79 turǵynǵa arnaıy qozǵalys quraldary berilgen. Oblys boıynsha arnaıy qural-jabdyqtarǵa muqtaj jandar tiziminde 700 adam bar. Olardyń 50-i – bala.
– Múgedektik belgilengen soń kórsetkishter boıynsha ońaltýdyń jeke baǵdarlamasy ázirlenedi. Kóz nashar kórip, qulaq durys estimese, sýrdotehnıkalyq quraldar daıyndalady. Ońaltý quraldary bólingen bıýdjetke baılanysty alynady. Bıýdjetten túsken qarjy kýrorttyq saýyqtyrýǵa, protezdik-ortopedııalyq qyzmetterge eseptelgen, – dedi oblystyq jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Zarına Álenova.
Oblys ortalyǵynda kópbalaly analardyń ótinishine qaraı «Múmkindigi shekteýli balalardy ońaltý úshin qosymsha ortalyq» ashyldy. Sondaı-aq oblystyq ákimdik qaladaǵy burynǵy balabaqshany kúrdeli jóndeýden ótkizip berdi. Ortalyqty qaıta qalpyna keltirip, múmkindigi shekteýli balalarǵa yńǵaıly etip jasaý jumystary júrgizildi.
Qazir ortalyqqa keletin balalar barlyq em-domdy qabyldaı alady. Oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetinshe, 80 orynǵa arnalǵan ortalyqta ońaltý merzimi úsh aı, odan keıin balalar demalys alady. Bir jyl aralyǵynda ortalyqta 300-ge jýyq múmkindigi shekteýli balany qabyldaýǵa múmkindik bar.
– Bizdiń balalarmen jumys isteýde úlken tájirıbemiz bar, – dedi tirek-qımyl apparaty buzylǵan balalardy ońaltý boıynsha qyzmet kórsetý ortalyǵynyń dırektory Roza Qadyrbekova. – Keıbir balalar bizde 4 saǵatqa deıin, keıbir balalar 10 saǵatqa deıin, al oblystyń basqa qalalary men aýdandarynan kelgen balalar táýlik boıy bolady.
Sonymen birge jýyrda oblys ortalyǵyna qarasty Kenjekól aýylynda múgedekterdi ońaltý kabıneti ashyldy. Onda múmkindigi shekteýli jandarǵa barlyq jaǵdaı jasalǵan. Al emdelýshilerdi Baqbergen Qalamush qabyldaıdy. Onyń ózi de múgedekter arbasyna tańylǵan jan. Qaıtse de júrip ketýdi armandaıtyn ol, ózi sııaqty arbaǵa tańylǵandarǵa kedergisiz ómir syılamaq.
– Aldymen «Atameken» kásipkerler palatasynda arnaıy kýrstan óttim. Jeke kásibimdi ashýǵa grant aldym. Biraq aýyldan múgedekterge arnalǵan arnaıy jattyǵý zalyn ashatyn oryn tappadyq. Oblys ákimi Bolat Baqaýovtyń qabyldaýyna jazylyp, kómek suradym. Ákim sózinde turdy, – dedi B.Qalamush.
Ońaltý kabıneti aýylda jýyrda ǵana paıdalanýǵa berilgen mádenıet úıiniń ishinen ashyldy. Kóp jyl boıy turǵyndar asyǵa kútip júrgen mádenıet úıinde 300 oryndyq zal, bı zaly jáne túrli úıirmelerge arnalǵan kabınetter bar. Al ońaltý kabınetin qajetti qural-jabdyqtarmen qamtamasyz etý úshin ERG kompanııasynyń atynan joba ıesine 5 mıllıon teńge grant berildi.
Buǵan deıin Aqsý ferroqorytpa zaýytynda eńbek etken B.Qalamushqa Eýrazııalyq toptyń ókilderi qoldaý kórsetipti.
Pavlodar oblysy
