О́ńirdegi barlyq 6138 kósheniń 632-siniń aty ıdeologııalyq jaǵynan eskirgen.Sonyń 98-iniń aty ózgertildi, bul 18 paıyzy bolyp sanalady. Sonymen qatar óńirdegi 156 aýyldan 63 aýyldyń esimi ózgertýdi qalaıdy, sonyń ázirshe 7-niń tarıhı ataýlary qalpyna keltirildi. Sońǵy eki jylda oblys boıynsha 1 aýdannyń, 7 aýyldyq okrýktiń, 7 aýyldyń, 106 kósheniń jáne 14 túrli nysannyń tarıhı ataýy qalpyna keltirildi jáne jańa ataý berildi. Bıyl burynǵy Taran aýdanyna Beıimbet Maılınniń, Qostanaı memlekettik pedagogıkalyq ýnıversıtetine ǵalym О́mirzaq Sultanǵazıniń, oblys ortalyǵyndaǵy Gagarın kóshesine Nursultan Nazarbaevtyń esimi berildi.
«Tilderdi damytý basqarmasyna ótken jyl men 2019 jyldyń 9 aıynda jeke jáne zańdy tulǵalardan onomastıka jónindegi 62 ótinish kelip tústi. Solardyń kóbisinde olar oblys kólemine tanymal tulǵalardyń esimin máńgilikke este qaldyrý maqsatymen olardyń atyn eldi mekender men kóshelerge berýdi suraıdy. Osy 62 ótinishtiń 44–iniń ıesine ol aıtqan másele sheshimin tappaıtynyn aıtyp túsindirdik» dedi Gúljan Ermashqyzy.
Konferensııada sóz alǵan fılosofııa ǵylymdarynyń kandıdaty, professor Qalqaman Jaqyp, О́.Sultanǵazın atyndaǵy Qostanaı memlekettik pedagogıkalyq ýnıversıtetiniń PhD doktory, qaýymdastyrylǵan professory Raýan Baıdaly jáne taǵy basqalar jerdiń ataýy memlekettigimizdiń bir rámizi derlik mańyzdy másele ekenin aıtty. Basqosýda pikir almasýlardan keıin, qarar qabyldanyp, oǵan mańyzdy usynystar engizildi.
