Sýretti túsirgen:Meıirbek TÁJQURANOV
Mýzeı alańynda ótken «Kóne dúnıe kúmbiri» atty konsertpen bastalǵan ashyq esik kúni «Mýzeı túnine» ulasty.
–«Mýzeıler sherýi» respýblıkalyq aksııasy elimizdiń Mádenıet jáne sport mınıstrliginiń bastamasymen uıymdastyrylǵan. Aksııa aıasynda mádenı sharalar estafetasyn kórshiles jatqan Atyraý oblysynan qabyldap aldyq.Elimizdiń tuńǵysh prezıdenti Nursultan Nazarbaevtyń qoldaýymen júzege asyp jatqan «Rýhanı jańǵyrý» baǵdarlamasy jáne «Uly dalanyń jeti qyry» jobasynyń negizgi maqsaty – tarıhı muralarymyzdy túgendeý, ótkenimizdi saralaý, bolashaq enshisine amanattaý.Tarıhymyz tereń, keleshegimizdiń kemel ekenin tanytýda mýzeılerdiń orny erekshe, – deıdi sharany ashqan Batys Qazaqstan oblystyq mádenıet basqarmasynyń basshysy Qadyrbolat Musaǵalıev.
Aq Jaıyqty tel emgen Batys Qazaqstan men Atyraý oblystarynyń kóp tarıhy ortaq. Degenmen, Atyraý óńirinen kelgen kórmelerdi jergilikti halyq jyly qabyldady. Saraıshyq mýzeı qoryǵynyń «Ortaǵasyrlyq Saraıshyq – Qazaq eliniń astanasy», Atyraý oblysy Mahambet aýdanynyń «Uly dala tarıhy – urpaqqa amanat» kórmeleriniń jádigerleri erekshe qyzyqty boldy. Ekspozısııalyq zaldarda etno-folklorlyq ansambl oryndaǵan ulttyq saz oınap, kórermen qaýym Altyn hanshaıym, Isataı men Mahambet, Troıa arýlary keıpine engen ártistermen birge sýretke tústi.
Osy kúni Batys Qazaq oblystyq tarıhı-ólketaný mýzeıiniń dırektory Mırbolat Ersaev «Mýzeı túni» estafetasyn Aqtóbe oblystyq tarıhı-ólketaný mýzeıiniń dırektory Meıram Dúısenǵalıǵa tabystady.
Aıta keteıik, «Kóne dúnıe kúmbiri» atty is-shara aıasynda mýzeıde kıiz basý ónerinen sheberlik synyp kórsetilip, jármeńke uıymdastyryldy. Sondaı-aq Jahansha Dosmuhameduly atyndaǵy pedagogıkalyq kolledj ujymy «Mýzeıstar-2019» jobasyn usyndy.
