Táýelsizdik jyldarynda Qazaqstanda áleýmettik memlekettiń berik negizi qalandy. Soǵan qaramastan Memleket basshysy qazaqstandyqtardy tıisti áleýmettik qajettiliktermen qamtamasyz etý baǵytyndaǵy jumystardy jalǵastyrý qajet dep esepteıdi. Endi Úkimet pen ákimderdiń qyzmeti negizinen osy kórsetkishter boıynsha baǵalanyp saralanatyn bolady. Joldaýda qazirgi áleýmettik-ekonomıkalyq jaǵdaıǵa jan-jaqty, tereń taldaý jasalǵan jáne ony túbegeıli ońaltý baǵytynda naqty mindetter qoıylǵan. Eń bastysy, Prezıdent eń ózekti degen máseleler boıynsha naqty mindetterdi qoıyp, onyń sheshilý baǵyttaryn anyqtady.
Turǵyndardyń kirisin arttyrý, ómir sapasyn jaqsartý sııaqty halyqty tolǵandyrǵan eń keleli problemalar jóninde salmaqty sóz qozǵaldy. Prezıdent memlekettiń tynys-tirshiliginen jan-jaqty habardar ekendigin tanytty. Osy turǵydan alǵanda, eń tómengi jalaqy mólsherin 1,5 esege arttyrý jónindegi mindet úlken mańyzǵa ıe bolmaq. О́ıtkeni bul 1 mln 300 myń adamnyń ómirimen baılanysty másele. 275 myń memlekettik qyzmetshiniń jalaqysy 35%-ǵa ósedi. О́zimiz bilim men ǵylym keńistiginde qyzmet etip jatqan soń Memleket basshysynyń muǵalimderdiń máselesin de nazardan tys qaldyrmaǵany kóńilimizdi qýantty. «Pedagogtardyń mártebesi týraly» jańa zań qabyldaý búginginiń kezek kúttirmeıtin máselesi ekenin barshamyz bilemiz. Prezıdenttiń ustazdarǵa salynǵan júktemeni azaıtyp, úsh aýysymdy bilim berý máselesin sheshý jónindegi tapsyrmasy der kezinde kóterilgen ádil sheshim der edik. Senatorlar qoǵam arasynda ábden sharyqtaý shegine jetken bul máseleni birneshe ret kótergen bolatyn. Endi mine, atalǵan zańnyń oryndalýyna óz úlesterin qosýǵa daıyn. Bul jerde joǵary oqý oryndarynyń professor-oqytýshylarynyń mártebesi týraly oılanatyn ýaqyt jetti dep oılaımyn.
Sondaı-aq Prezıdent «Qazaq tiliniń memlekettik til retindegi róli kúsheıip, ultaralyq qatynas tiline aınalatyn kezeńi keledi dep esepteımin. Biraq mundaı dárejege jetý úshin bárimiz dańǵaza jasamaı, jumyla jumys júrgizýimiz kerek», dep ýaqyt óte kele ultaralyq qatynas tili qazaq tili bolatyndyǵyna senim bildirdi. Árıne sóz joq, memlekettik tildiń áleýetti, qýatty bolýyna eren eńbek etetinimiz sózsiz.
Menińshe, Prezıdenttiń medısına, qoǵamdyq tamaqtaný men kórsetiletin qyzmet máselelerin qamtıtyn Qyzmet sapasyn baqylaý jónindegi biryńǵaı komıtet qurý jónindegi bastamasy óte qajet. Bul turǵyndarǵa sapaly qyzmet kórsetý sııaqty problemany sheshýge degen umtylys.
Memleket basshysynyń turǵyndardy baspanamen qamtý isindegi jaıbasarlyqqa alańdaýy da negizsiz emes. Osyǵan jaýap retinde Prezıdent ákimderge jergilikti bıýdjetten jeńildikpen beriletin ıpotekanyń bastapqy jarnasyn sýbsıdııalaý máselesin qarastyrýdy tapsyrdy jáne iri qalalarda áleýmetik jaǵynan az qamtylǵan azamattarǵa arnalǵan jaldamaly úılerdiń qurylysyn keńeıte túsýdi mindettedi. Mine, búgingi tańda muǵalimder, dárigerler, polısııa qyzmetkerleri men jas mamandar tap osyndaı qadamdardy kútip otyr. Aldaǵy 5 jylda 650 otbasy men 2 mln-nan astam qazaqstandyq ózderiniń áleýmettik jaǵdaılaryn ońaltyp alýlary kerek.
Árbir azamattyń óziniń ómir turmysynyń sapaly da jaqsy bolýy árkimniń ózine baılanysty. Degenmen memleket tarapynan baǵamdy baǵdar arqyly birtutas damý jolyna túsý – elimizdiń turaqty bolýynyń kepili.
Aıman ZEINÝLINA,
fılologııa ǵylymdarynyń
kandıdaty, professor
