Qoǵam • 21 Qazan, 2019

Onkologııa salasyndaǵy sarapshylar obyrdy emdeýdiń ozyq ınnovasııalyq tehnologııalaryn alǵa tartty

44 retkórsetildi

Sońǵy kúnderi elimizdiń medısına salasyndaǵy aıtýly oqıǵalardyń biri – Nur-Sultan qalasynda TMD elderiniń ishinde tuńǵysh ret ótken Onkologııadaǵy Búkilálimdik kóshbasshylar sammıti boldy. Sondaı-aq aýqymdy shara QR onkologtary men radıologtarynyń VII sezine ulasty. Sezd jumysyna Qazaqstan, Ortalyq Azııa, TMD jáne alys shetelderden 500-den astam delegat qatysty.

Sezde sóz alǵandar onkologııalyq aýrýlardy dıagnostıkalaý men emdeýdegi ınnovasııalyq jetistikterge erekshe nazar aýdarǵany belgili. Sońǵy jyldary bul baǵytta árbir naýqastyń jeke genetıkalyq erekshelikterin eskere otyryp, emniń sapasyn kóterip, densaýlyq saqtaý júıesindegi shyǵyndardy azaıtýǵa múmkindik beretin derbestendirilgen terapııa strategııasyn ázirleýge basa nazar aýdaryldy.

Dúnıejúzilik densaýlyq saqtaý uıymynyń (DDU) derekterine sáıkes, dástúrli tásil kezinde densaýlyq saqtaýdaǵy barlyq shyǵyndardyń 20-40% qaıtarymsyz shyǵyndarǵa jatady, ıaǵnı em-domǵa ketetin qarjy emdelýshilerge paıda ákelmeıdi. Bul másele onkologııa salasy úshin de ózekti. Sarapshylardyń baǵalaýynsha, klassıkalyq hımıoterapııa naýqastardyń tek 23%-na ǵana kómektesedi. Derbestendirilgen medısınanyń arqasynda árbir naýqastyń ózine tıimdi emin qajetti kezinde alyp, emdeý nátıjelerin ózgertip otyr. Ol emdelýshilerge uzaq jáne sapaly ómir súrýge kómektesedi.

Qazirgi tańda álemdik tájirıbede dıagnostıkanyń ınnovasııalyq ádisi – keshendi genomdyq profıldeý (KGP) keńinen qoldanylady. Keshendi genomdyq profıldeý kelesi býyndy sekvenırleý ádisimen júzege asyrylady (NGS). Bul ınnovasııalyq ádis keıinnen dál terapııany tańdaý úshin naýqas isiginiń molekýlıarlyq-genetıkalyq beınesin anyqtaýǵa múmkindik beredi. Zertteý derekterine sáıkes, eki birdeı genetıkalyq profıl bolmaıdy, ıaǵnı genetıkalyq derekter negizinde árbir naýqas úshin qandaı terapııa neǵurlym tıimdi bolatynyn boljaýǵa bolady.

Keshendi genomdyq profıldeýdi júrgizý úshin isiktiń bir úlgisinde barlyq klınıkalyq mańyzy bar genderdegi molekýlalyq-genetıkalyq ózgeristerdi taldaıtyn test ázirlendi. Osy ádistiń sezimtaldyǵy men ereksheligi 95%-dan asady. Barlyq genetıkalyq ózgeristerdi jáne preparattarǵa rezıstenttiliktiń damý qaýpin eskere otyryp, árbir naqty naýqastyń isigin taldaý, belgili bir mýtasııalardy anyqtaý isikke qarsy terapııany tıimdi tańdaýǵa jáne júrgizýge múmkindik beredi. Nátıjesinde emniń tıimdiligi aıtarlyqtaı artady. Jalǵan oń jáne jalǵan teris nátıje alý qaýpi azaıady, al bul óz kezeginde tıimsiz taǵaıyndalǵan preparattardyń sanyn azaıtýǵa septigin tıgizedi.

Bul týraly Sorbonna ýnıversıteti Onkologııalyq ortalyǵynyń atqarýshy dırektory, professor Djozef Glıgorov: «Kóptegen naýqastar úshin dıagnostıkanyń dástúrli ádisterin qoldanǵanda alynǵan jalǵan teris nátıjeler targettik terapııany qoldanýdyń jiberip alynǵan múmkindigine aınalady. Ol jaýap berý jıiligi, progresssiz ómir súrý, ómir súrý sapasy, jalpy ómir súrý sııaqty klınıkalyq nátıjelerdi jaqsarta alady. KGP onkologııalyq aýrýlardy emdeýge baǵyttalǵan qarajatty paıdalanýdy ońtaılandyrýǵa múmkindik beredi. Birinshiden, barlyq yqtımal mýtasııalardy anyqtaý úshin keshendi bir rettik dıagnostıka júrgizý esebinen, ekinshiden, tıisti dıagnostıkasyz tańdalǵan tıimsiz terapııa shyǵyndaryn qysqartý esebinen júzege asady», deıdi.

KGP ádisi álemniń 50-den astam elinde, onyń ishinde AQSh-ta, Izraılde, Germanııada, Japonııada, Ulybrıtanııada qoldanylady. Ǵalymdar keshendi genomdyq testileýdi Densaýlyq saqtaý júıesiniń qural-jabdyqtaryna derbestendirilgen terapııany damytýdyń mańyzdy quraldarynyń biri retinde qosý qajettigi týraly aıtady. Bul baǵyttaǵy qadamdardy Qazaqstandy qosa alǵanda, kóptegen elder qolǵa alýda.

Máselen, Almatydaǵy Qazaq Onkologııa jáne Radıologııa Ǵylymı-Zertteý ınstıtýty Qazaqstanda alǵash ret AQSh jáne Germanııanyń syrtqy zerthanalarymen birlesip júrgiziletin qaterli isikterdi Keshendi Genomdyq Profıldeý – onkologııadaǵy dıagnostıkanyń ınnovasııalyq ádisin engizgen.

Qazaq onkologııa jáne radıologııa ǵylymı-zertteý ınstıtýty AQ strategııalyq damý departamentiniń dırektory Oksana Shatkovskaıa: «Qazirgi ýaqytta Qazaqstanda onkologııalyq aýrýlarmen kúresýdiń 2018-2020 jyldarǵa arnalǵan Keshendi jospary júzege asyrylyp otyr. Onyń negizgi maqsaty qaterli isikterdiń aýyrtpalyǵyn tómendetý bolyp tabylady. Osy baǵdarlamany iske asyrý sheńberinde óńirlerde búkil álemdegi onkologııalyq naýqastardy tekserýdiń ajyramas bóligi bolyp tabylatyn negizgi ornalasqan isikterdiń (ókpe obyry, melanoma, kolorektaldy obyr) molekýlıarlyq – genetıkalyq testileýine negizdelgen onkologııalyq aýrýlardy derbes dıagnostıkalaýdyń qazirgi zamanǵy ádisteri engizilýde. Árbir naqty naýqastyń isigin taldaý, belgili mýtasııalardy anyqtaý (EGFR, BRAF, ALK jáne t.b.) isikke qarsy terapııany tıimdi júrgizýge múmkindik beredi», deıdi.

Keshendi genomdyq profıldeýdi qoldaný dıagnostıkany (testerdiń sezimtaldyǵy men ereksheligi >95%) barynsha dál júrgizýge, isiktegi molekýlalyq-genetıkalyq ózgeristerdi (320 gennen astam) anyqtaýǵa jáne barlyq genetıkalyq ózgerister men rezıstenttiktiń damý qaýpin eskere otyryp, árbir naqty jaǵdaıda tıimdi targettik terapııany derbestendirilgen irikteýdi júzege asyrýǵa múmkindik beredi.

Sońǵy jańalyqtar

Qazalyda retro-festıval ótti

Aımaqtar • Búgin, 16:58

Qarqaraly aýdanyna jańa ákim taǵaıyndaldy

Taǵaıyndaý • Búgin, 16:02

Kúlki kerýeni № 20

Rýhanııat • Keshe

Haliń qalaı, Qostanaı?

Aımaqtar • Keshe

Uqsas jańalyqtar