Chelıabi oblysynyń gýbernatory Alekseı Teksler bastaǵan úlken delegasııanyń Qostanaı oblysyna kelý maqsaty da qatar jatqan eki óńir ekonomıkasynyń damýyna, týrızm men mádenı salalardyń jandanýyna yqpal etý bolatyn.
Ádette, kórshiler arasyndaǵy baılanys aldymen ekonomıka flagmandarynan bastalatyny belgili. О́ndiris olarda da bar, al bizdiń kenishter qashannan irgedegi Magnıtogorsk metallýrgııa kombınatynyń negizgi áriptesi bolyp sanalady. Eki oblys arasyndaǵy taýar aınalymynyń da negizgi bóligin Sokolov-Sarybaı ken óndirý birlestigi shyǵaratyn temir keni quraıdy. Qazir Qostanaıda óńdeý ónerkásibi damýǵa baǵyt alǵan. Onyń kóshin mashına qurastyrý zaýyttary bastap otyr. Chelıabi bul oraıda da Qostanaıǵa áriptes, odan bizdiń zaýyttar mashına bólshekterin, quramalaryn alady.
Delegasııa Qostanaı qalasyndaǵy saltanaty syrttan kelgen qonaqtarǵa tańdaı qaqqyzatyn jańa záýlim «Jastar saraıyna» keldi. Qonaqtar qurqol emes edi, osyndaǵy chelıabilikter alyp kelgen kórmeler jalpy jurtshylyqtyń da, Qostanaı oblysy kásipkerleriniń de nazaryn erekshe aýdardy. Jalpy, Chelıabi oblysynyń búgingi beınesin, ekonomıkadaǵy, áleýmettik saladaǵy, týrızm boıynsha áleýetin kórsetetin fotokórmeniń janyna jurtshylyq kóbirek toqtady. Týrızmniń «shaqyrtqysy» qolóner sheberleri men «Ýveldy» sanatorııiniń mamandary týrısterdi tartýdyń syryn uǵyp qalǵandaı.
Kezdesýde eki oblystyń atqarýshy bılik organdary men bıznes qoǵamdastyqtary arasynda birneshe memorandýmǵa qol qoıyldy. Aldymen Sokolov-Sarybaı ken óndirý birlestigi men Magnıtogorsk metallýrgııa kombınaty, «SaryarqaAvtoProm» mashına qurastyrý zaýyty men «Sýhoı port Iýjnoýralskıı» zaýyty arasynda memorandýmǵa qol qoıyldy. Sonymen qatar Qostanaı oblystyq deneshynyq-
tyrý jáne sport basqarmasy men Chelıabi oblystyq deneshynyqtyrý jáne sport mınıstrligi, Qostanaı oblystyq aqparattandyrý, memlekettik qyzmet kórsetý jáne arhıvter basqarmasy men Chelıabi aqparattyq tehnologııalar mınıstrligi arasynda da osyndaı kelisim jasaldy.
– Kórshilermiz, qashannan tamyrlasyp qalǵan. Al osyndaı kezdesýler bizdiń dostyǵymyzdy nyǵaıtady, ekonomıkalyq, mádenı baılanystarymyzdy kúsheıtedi. Eki oblystyń taýar aınalymy úlken, biraq oǵan toqmeıilsimeı, alǵa jyljý kerek, – dedi Chelıabi oblysynyń gýbernatory Alekseı Teksler. Eki oblys kórshi ǵana emes, ekonomıkada bir-birine strategııalyq áriptes te bolyp keledi. Ony Qostanaı oblysynyń ákimi Arhımed Muhambetov nyqtap aıtty.
– Chelıabi oblysy bizdi kóp salada qyzyqtyrady. Mysaly, qazir tek Qostanaıda ǵana emes, «Nurly jol» baǵdarlamasymen jalpy elimizde turǵyn úı qurylysy qarqyndy júrip jatyr. Al Chelıabide munaraly kran shyǵaratyn kásiporyn bar. Ol bizge óte qajet. Sonymen qatar mádenıet, aýyl sharýashylyǵy salalarynda da kórshiden alarymyz da, bererimiz de bar. Olarda týrızm de jaqsy damyp otyr, – dedi Arhımed Begejanuly. Iá, shekaranyń arǵy betindegi «Ýveldy» sanatorııine jylyna 2 myń qostanaılyq baryp demalady eken.
Chelıabi oblysy – Reseıdiń ekonomıkalyq qýatty, bıýdjetiniń qomaqty bóligin beretin oblystarynyń biri. Delegasııa quramynda kelgen Ońtústik Ýral ónerkásip palatasynyń prezıdenti Fedor Degterevtiń aıtýyna qaraǵanda, Chelıabi úshin Qazaqstan strategııalyq seriktes bolyp sanalady. Onyń taýar aınalymynyń tórtten biri Qazaqstanǵa tıesili. Alaıda Chelıabi oblysynan bizge óńdeý kásiporyndarynyń ónimi kelse, Qostanaıdan álde de shıkizat alynady. Aýyl sharýashylyǵynan da shıkizatty kózdeıdi.
– Chelıabide ónimin Eýropaǵa, onyń ishinde Italııaǵa jiberetin asa qýatty makaron kásiporny bar. Oǵan qatty bıdaıdy biz Qostanaıdan alamyz, – deıdi Fedor Degterev.
Qostanaıdan da Chelıabige qatty bıdaı emes, un, un ǵana emes, makaron jóneltetin kúnder týar degen oıǵa kelemiz. Ol úshin kórshiden úırenýdiń de sókettigi joq.
Kezdesýden keıin Chelıabiniń ataqty «Ýral» bı ansambli men qostanaılyq ónerpazdardyń qatysýymen úlken konsert boldy.
QOSTANAI
