Taraz topyraǵyna kelgen dızaınerlerdiń ishinde «Milano fashion week» prezıdenti Marıanna Mıchelı, mılandyq feshn-fotosýretshi Daglas Basset, amsterdamdyq etnıkalyq sán aptalyqtarynyń uıymdastyrýshysy, «Asia fashion week» jáne «Africa fashion week» sán aptalyqtarynyń prezıdenti Aıdyn Achık, Bishkek qalasynan kelgen sán sarapshysy Natalıa Sýltanova, Qyrǵyzstannyń «Podium» jýrnalynyń basshysy Nazıra Begim, etnodızaınerlerdiń eýrazııalyq qaýymdastyǵynyń tóraıymy Roza Haltýeva, «Libos» dızaın ortalyǵynyń basshysy, О́zbekstan sán aptalyǵynyń seriktesi Kamola Gýlıamova, ýkraınalyq dızaıner Oksana Henda, «Mıss Bolgarııa – 2017» baıqaýynyń jeńimpazy modeler, bloger Veronıka Stefanova sııaqty belgili azamattar boldy.
Búginde Qazaqstandaǵy sán áleminde «Aspara» brendiniń alatyn orny erekshe. Osy ýaqytqa deıin ótip kelgen «Aspara fashion week» sán aptalyǵynyń tórtinshi kezeńi taǵy da Taraz shaharynda jalǵasyn tapty. Atalǵan sán aptalyǵy osy ýaqytqa deıin Shymkent, Taraz jáne О́zbekstannyń Tashkent qalalarynda uıymdastyrylǵan bolatyn. Mundaı aýqymdy sán merekesin elimizge ǵana emes, Eýropaǵa tanymal dızaıner, «Asyl-Dızaın» sán úıi men «Aspara» modeldik óner jáne bıznes kolledjiniń negizin qalaýshy Aıdarhan Qalıev uıymdastyrdy.
Taraz qalasyndaǵy «Balasaǵun» ortalyq konsert zalynda ótken sharada áýeli oblystyq qolóner buıymdarynyń baıqaýynda oza shapqan talanttar marapattaldy. Baıqaý barysynda túrli tabıǵı jáne jasandy zattardan jasalǵan halqymyzdyń ejelgi salt-dástúrlerin dáripteıtin buıymdar qazylar alqasynyń qyzyǵýshylyǵyn týdyrdy. «Biz jastardy mádenı jáne ulttyq qundylyqtardy dáripteýge shaqyrý jolynda qyzmet etip kelemiz. Kolledjdi qurǵan 20 jyl ishinde biz 1500-ge jýyq talantty dızaıner, shashtaraz, vızajıs, stılıs men modelerdi tárbıeledik. Olardyń barlyǵy búginde Tarazdy respýblıkalyq jáne halyqaralyq deńgeıde tanytyp keledi», deıdi Aıdarhan Qalıev. Al, «Arai Plaza» bıznes ortalyǵynyń saltanat saraıynda ótken sán aptalyǵynyń alǵashqy kúninde dızaınerler neofolklor stılinde ázirlegen toptamalaryn sán sarapshylarynyń nazaryna usyndy. Atalmysh synnan súrinbeı ótken talanttar ulttyq naqyshtaǵy kıimderdi álemge ashyq eksporttaýǵa múmkindik alady.
Sán aptalyǵy kezinde kelýshiler Aıdarhan Qalıevtiń «Taraz perileri» toptamasynyń tanystyrylymyn tamashalady. Toptamanyń basty nyshany retinde qazaq halqy qasıet tutqan ana kımeshegi tańdaldy. Neofolklor baǵytyn tek Ortalyq Azııaǵa ǵana emes, kúlli álemge tanytqan dızaınerdiń týyndylaryna mártebeli meımandar erekshe nazar aýdardy. Al «Asyl-Dızaın» sán úıiniń basshysy Aıdarhan Qalıev bul toptamany ázirleýde qazaq áıelderiniń, onyń ishinde óz anasynyń kıim úlgilerinen shabyt alǵanyn aıtady. «Asyl-Dızaın» sán úıiniń bulaı atalýy tegin emes. Asyl – meniń anamnyń esimi. Al kımeshek – qazaq analarynyń bas kıimi. Kımeshek kııýdiń óz joralǵysy, ózine tán ereksheligi, kıesi bar. Bul bizdiń ultymyzdyń dúnıetanymy óte tereń ekenin ańǵartady. Keleshekte aldaǵy 5-6 jyldyń ishinde zamanaýı stıldegi kımeshekter Eýropada trendke aınalsa, men áý bastaǵy maqsatyma jettim dep bilemin», deıdi Aıdarhan Qalıev. Sonymen qatar kórshiles qyrǵyz elinen kelgen dızaıner Tatıana Vorotnıkova kópshilikti erekshe bas kıimderimen tańǵaldyrsa, nursultandyq modeler Álııa Saǵdıdiń toptamasynda qanyq túster men florıstıkalyq elementter kórinis taýyp, kópshiliktiń kózaıymyna aınaldy. Ýkraınanyń Lvov qalasynan kelgen Natalıa Iаrýsh óz toptamasynda slavıan halqynyń qarapaıym ári úılesimdi órnekterin qoldanǵan bolsa, varshavalyq Barbara Salıdiń toptamasynda teriden tigilgen kıimder men shilter basym tústi. Álemniń ár qıyrynan kelgen ózge de sángerler ózderine tán erekshelikterimen kelýshilerdi tańdandyrdy.
Sán álemi sańlaqtarynyń nazaryn Taraz shaharyna aýdarǵan halyqaralyq sharanyń qorytyndy bóliminde «Neo folklore» baıqaýynda úzdik dep tanylǵan dızaınerlerge qazylar alqasynyń músheleri álemniń eń úzdik sanalatyn sán aptalyqtaryna arnaıy joldama tabystady. Atap aıtqanda, almatylyq Raýshan Ánýarbekova Mılandaǵy, qyzylordalyq Aıda Kerimqulova Serbııadaǵy, tarazdyq Qarlyǵash Esbolǵanova men Ásem Mýsralıeva Amsterdamdaǵy, kórshiles Qyrǵyzstannan kelgen Maqsat Smanov pen Bolotbek Alısherov Kappadokııadaǵy, nursultandyq Dana Ashımova Delıdegi sán aptalyqtaryna jáne Bolgarııadan kelgen jas sánger Tanıa Iаn kelesi jylǵy «Aspara fashion week» sán aptalyǵyna tegin qatysýǵa múmkindik aldy. О́z kezeginde qorytyndy sóz alǵan Aıdarhan Qalıev mundaı sán aptalyǵyn elimizde ári qaraı da dástúrli túrde uıymdastyryla beretinin jetkizdi. «Men eki myń jyldyq tarıhy tereńge tamyr tartqan Tarazdy erekshe súıemin. О́z halqymnyń ulttyq negizin saqtaý jolynda osy kásipti qolǵa alyp, sán salasynda belgili dárejede abyroıǵa ıe boldym. Bul – tek meniń ǵana emes, «Asyl-Dızaın» sán úıiniń, «Aspara» kolledji qyzmetkerleriniń eńbegi», dedi ol óz sózinde. Sonymen qatar Italııadan kelgen Marıanna Mıchelı qazaqtyń ulttyq kıimderine qyzyǵatynyn, sondyqtan da Qazaqstanǵa jıi keletinin aıtsa, mılandyq feshn-fotosýretshi Daglas Basset Tarazǵa ár kelgen saıyn kóne shahardyń tabıǵaty tamsandyratynyn jetkizdi. О́zge de sángerler qazaq halqyna, Taraz qalasyna degen ıgi tilekterin joldady.
TARAZ
