A. Ospanov atap ótkendeı, Qazaqstanda 1 qarashadan bastap mekenjaı anyqtamasy talap etilmeıdi jáne memlekettik kórsetiletin qyzmetter tiziliminen alynyp tastalatyn bolady. Iаǵnı, esh memlekettik organ, mektep ne medısınalyq mekeme azamattardan mekenjaı anyqtamasyn 1 qarashadan bastap surata almaıdy. Ony «Azamattarǵa arnalǵan úkimettiń» fılıaldarynan da, elektrondy úkimet portalynan da alý múmkindigi bolmaıdy.
«Qajet bolǵan jaǵdaıda qazaqstandyqtar tirkeýge turǵan mekenjaılaryn egov.kz elektrondy úkimet portaly men eGov mobile qosymshasyndaǵy jeke kabıneti arqyly teksere alady»,- dedi A. Ospanov.
Memlekettik organdarǵa keletin bolsaq, olar bul málimetti ishki ister mınıstrliginiń derekter bazasymen ıntegrasııalanǵan aqparattyq júıeleri arqyly alatyn bolady.
Sonymen qatar A. Ospanov jumys berýshilerdiń mekenjaı anyqtamasyn suraýǵa quqylary joq ekenin aıtty. Birinshi kezekte, eńbek kodeksinde turǵylyqty mekenjaıyn rastaıtyn qujatty usyný qajettigi týraly talap joq.
«Eger biz búgin memlekettik deńgeıde mekenjaı anyqtamasy uǵymyn alyp tastaıtyn bolsaq, onda azamattan bul qujatty eńbekke ornalasý kezinde talap etýge eshkimniń quqyǵy joq. Sondyqtan biz barlyq jumys berýshiler jumysqa eńbekke ornalasýǵa qatysty ózderiniń talaptaryn sáıkestendirýi kerek dep otyrmyz»,- dedi vıse-mınıstr.
Jumys berýshilerden basqa, mekenjaı anyqtamasyn elimizdegi barlyq mekemeler endi suramaýy tıis.
«Biz búgin elimizde turǵylyqty orny men mekenjaıy týraly uǵymdy túbegeıli ózgertip otyrmyz. Buryn biz ár adym saıyn, barlyq jerde - eńbekke ornalasqanda, jumysqa qabyldaǵanda, medısınalyq uıymda, balabaqshalarda, PIK qyzmetterine kelisimsharttar jasasý úshin t.b. ony rastaýymyz kerek bolatyn. Barlyq jerde biz bul anyqtamany baryp alyp, ony suraǵan mekemege usynýymyz kerek bolatyn. Bizde osy málimetterdiń qajettiginen bas tartýǵa negiz bolǵan joq. Al búgin barlyq turǵyndarǵa osyndaı múmkindikti usynyp otyrmyz. Qazir Qazaqstan azamaty óziniń qandaı da bir mekenjaı boıynsha turyp jatqanyn eshkimge dáleldeýge mindetti emes»,- dedi A. Ospanov.
Medısınalyq jáne bilim berý mekemelerine kelsek, bul uıymdarda ıntegrasııalanǵan aqparattyq júıeler bar. Mysaly, barlyq medısınalyq mekemelerde búginde Biryńǵaı densaýlyq saqtaý aqparattyń júıesimen kiriktirilgen aqparattyq júıeler jumys isteıdi. Dárigerdiń qabyldaýynda bolý úshin eń aldymen turǵylyqty jeri boıynsha tirkelýi kerek. Eger buryn osy kezeńde mekenjaı anyqtamasynyń bolýy mindetti bolsa, qazir ol talap etilmeıdi.
«Bilim berý mekemelerinde de solaı. Medısınalyq jáne bilim berý mekemelerimen jumystardy biz ótken jyly bastadyq. О́tken jyldyń jazynda ata-analardan mekenjaı anyqtamasyn usynýdy talap etýge tyıym salynǵan edi. Ákimdikter deńgeıinde túsindirý jumystary júrgizildi»,- dedi vıse-mınıstr.
Sonymen qatar ol búgingi tańda elektrondy formatta 28 anyqtama beriletinin aıtty. Jyl saıyn túrli uıymdarǵa usyný úshin 20 mln-nan asa anyqtama basyp shyǵarylady eken. Kelesi jyldan bastap mekenjaı anyqtamasy tárizdi, basqa da anyqtamalardy birtindep alyp tastaý kózdelip otyr.
