Yntymaq mekeni retinde tanylary anyq
Tuńǵysh Prezıdentimiz Nursultan Nazarbaevtyń bastamasymen kórkeıip kele jatqan Túrkistan búkil túrki áleminiń ortalyǵyna aınalý maqsatynda damýda. Bul oraıda Elbasynyń: «Túrkistan qalasy – túrki dúnıesine ortaq mádenı orda. Sondyqtan túrkitildes elder de Túrkistannyń gúldenýine ózindik úlesterin qosatyn bolady. Rýhanı shahar osylaısha túrki álemi elderin jaqyndastyra túsetin yntymaq nyshany bolmaq», – degen sózi oblys ortalyǵynyń erteńine degen senimimizdi nyǵaıtyp otyr.
Túrkistan ejelden kúlli Túrki jurtshylyǵynyń táý eter qasıetti turaǵyna aınalǵan. Kún saıyn aǵylyp keletin myńdaǵan týrıstiń tolastamaýy – osynyń aıqyn dáleli. Aty álemge áıgili shahardyń jańa mártebe alýy, murajaılardyń kóptigi, «Kúltóbe qalashyǵy» arheologııalyq parkin qurý da týrızmniń damýyna oń áserin tıgizeri anyq. Tarıh taspasynda qalatyn Jarlyqqa qol qoıyp, kóp uzamaı Túrkistanǵa arnaıy kelip, jańa oblys ortalyǵy retindegi damý tujyrymdamasyn bekitip bergen Elbasy mundaǵy qarqyndy jumysty bir sát te nazarynan tys qaldyrǵan joq. Bul mańyzdy oqıǵanyń oryn alǵany kúni keshe ǵana sııaqty edi. Araǵa jyldan asa ýaqyt salyp, alǵashqy nysandar Elbasynyń qatysýymen ashylyp, el ıgiligine berildi.
Dalasynan tulparlardyń dúbiri estilgen, qoınaýy tarıh pen syrǵa toly Túrkistan qalasy búginde kóz aldymyzda gúldenip keledi. El bılegen bıler men qanshama abyz, batyrlardyń súıegin qoınaýynda saqtap jatqan kıeli topyraqtan túlep shyqqan tulǵalar men qala turǵyndary yntymaqtastyq pen birlikte Túrkistannyń kemel keleshegine óz úlesin qosary anyq. Kúni keshegi saparynda oblys ortalyǵynda atqarylyp jatqan jumystarǵa oń baǵa bergen Elbasy qurylystyń qarqyndy júrgizilýi, jańa nysandardyń kóptep salynýy jastar úshin jańa jumys oryndaryn ashýǵa múmkindik jasaıtynyn atap ótti. «Búkil Qazaqstan jurtshylyǵy Túrkistannyń damýyn qoldap otyr. Árbir úı, árbir qala – Qazaqstannyń baılyǵy. Elordany salǵan kezde qarjylandyrýǵa baılanysty suraqtar bolǵan edi. Endi Nur-Sultan qalasy barlyq shyǵyndardy ótep, jyl saıyn bıýdjetke trıllıondaǵan kiris ákelip otyr», dedi Elbasy. Sol sııaqty keshegi sheshimge kúmánmen qaraǵan keıbireýlerdiń kúdigi seıilip, Túrkistannyń jarqyn bolashaǵyna degen senimi artty. Osy qarqynmen rýhanı qala barlyq baǵytta damyǵan, Túrki elderiniń yntymaq mekenine aınalary anyq.
Shalataı MYRZAHMETOV,
memleket jáne qoǵam qaıratkeri
Túrkistan oblysy
Elbasy sózi aqıqatqa aınalyp keledi
Jýyrda Túrkistanǵa jumys saparymen kelgen Elbasy N.Nazarbaev Táýelsizdik alǵan soń Túrkistandy bolashaq astana retinde qarastyrǵanyn, biraq jaǵdaı buǵan jol bermegenin atap ótti. Jalpy, Nursultan Ábishuly Túrkistandy túletýge erekshe den qoıyp keledi. Qalanyń oblys ortalyǵyna aınalyp, qurylystyń buryn-sońdy bolmaǵan qarqyn alýy – sonyń bir aıǵaǵy.
Búgingi Túrkistan, burynǵydan áldeqaıda ózgere jańaryp, jasarǵan. Tuńǵysh Prezıdentimizdiń «Kóne Túrkistan jańa Qazaqstannyń shyraıly shaharyna aınalady» dep tasqa qashap jazdyrǵan sózi aqıqatqa aınalyp keledi. Qurylystyń qarqynyn qalaǵa kire bergennen-aq baıqaý qıyn emes. Bul aldaǵy úlken isterdiń bastaýy ǵana. Qalanyń bas josparyna sáıkes áli talaı joba júzege asyrylatynyna senim mol. Búginde ákimshilik ǵımarattardy, turǵyn úılerdi, áleýmettik jáne ınjenerlik ınfraqurylymdardy qamtıtyn, Túrkistanda qolǵa alynǵan jalpy quny 275 mıllıard teńge kólemindegi qarjy qarastyrylyp, júzege asyrý josparlanǵan 150 qurylys nysanynyń 102-si bıyl paıdalanýǵa berilmek. Qazirdiń ózinde qalanyń ajaryn asha túsken jańa nysandar el ıgiligine qyzmet ete bastady.
Eshqashan sózi men isi alshaq bolyp kórmegen Nursultan Ábishulynyń muryndyq bolýymen ár jyldary Túrkistan shaharyna baýyrlas Túrkııa eliniń basshylary Turǵyt О́zal, Súleımen Demırel, Ahmet Sezer, Abdýlla Gúl, Rejep Erdoǵan arnaıy kelip, Iаsaýı mazarynyń basynda duǵa oqydy. Bul olardyń túrkiniń qarashańyraǵyn ustap qalǵan qazaq topyraǵyna degen rııasyz kóńiliniń, sheksiz qurmettiń belgisi bolsa kerek. Sondaı-aq Tuńǵysh Prezıdentimiz Q.A.Iаsaýı atyndaǵy HQTÝ-dyń ashylýynda oqý orny «Túrkistandy órkenıet bıigine kóteredi» dep senim bildirgen-di. Búginde oqý orny qalashyǵy aýmaǵynyń ulǵaıa bastaǵanynyń ózi bul oıynyń aınymastaı oryndalyp kele jatqanyn ańǵartady. Jalpy, Túrkistannyń ósip-órkendeýi tek elimizdiń bedelin bıiktetip, álem aldyndaǵy abyroıyn asqaqtatyp qana qoımaı, kúlli túrki dúnıesiniń mártebesin kótere túseri sózsiz.
Jeńisbek MÁÝLENQULOV,
Túrkistan oblystyq ardagerler keńesiniń tóraǵasy
