Shyńǵyrlaý aýylyn shoıyn jol ekige bólip jatyr: el arasynda «Astyq qabyldaý beketi» dep atalyp ketken shaǵyn aýdanda 127 úı, 500-ge jýyq turǵyn bar. Aýyldyń negizgi bóliginen – ákimshilik jáne áleýmettik ǵımarattardan ajyratyp jatqan úsh qatar relsten shaǵyn aýdannyń halqy shybyn janyn shúberekke túıip, attap ótetin. Erterekte poıyz adam qaǵyp ótken oqys oqıǵalar da bolǵan. О́ıtkeni kún saıyn aǵylyp jatatyn júk kerýenderinen bólek, Batys Qazaqstan oblysyn «úlken jermen» jalǵaıtyn «Nur-Sultan-Oral», «Almaty-Oral» baǵytyndaǵy poıyzdar da dál osy jolmen ótedi. Memlekettik shekaradaǵy beket bolǵandyqtan, jolaýshy poıyzdary saǵattap kidirip, shekaralyq-kedendik baqylaýdan ótkiziledi. Sol kezde shyńǵyrlaýlyqtar uzyn-shubaq kerýendi aınalyp ótýge erinip, vagon astynan eńbektep ótip jatady. Bul árıne, óte qaýipti bolatyn.
Búginde Shyńǵyrlaý aýylynda 8 myńdaı halyq bar. Aýyldyń sáýleti kún sanap artyp, jol tóselip, jańa ǵımarattar, eńseli eskertkishter turǵyzylýda. Shaǵyn aýdan turǵyndarynyń kópten kútken temir jol kópirin osy aýyldyń eńbek ardageri, qadirmendi azamaty bolǵan Daýyn Bekqulovtyń 100 jyldyǵyna oraı onyń týystary kóteripti. Tıptik úlgige saı, alty qanat satyly, jaryqtandyrylǵan, zamanaýı kópir qaýipsizdikti qamtamasyz etip qoımaı, aýyldyń kórkine kórik qosypty. Ásirese shetki aýyldan qatynap oqıtyn 70-ten asa oqýshy balanyń qýanyshynda shek joq eken.
- Temir jol beketinde mundaı kópir óte qajet. Batys Qazaqstan oblysynyń Jánibek, Saıhyn aýyldarynan da reseılik júrdek poıyzdar jıi ótip jatady. Olar qazaqstandyq beketterge tipti toqtamaıdy da. Mine, atalǵan aýyldarǵa osyndaı kópir salynsa dep armandaımyn. О́ıtkeni, atalǵan eki aýylda da talaı márte oqys oqıǵa boldy, poıyzǵa soǵylyp birneshe adam qaza tapty, - deıdi qoǵam belsendisi Aıbolat Qurymbaev.
Batys Qazaqstan
