Dıplomat M. Qozybaev atyndaǵy SQMÝ-niń stýdentterimen, oqytýshylarymen kezdesip, Shvesııanyń femınıstik syrtqy saıasaty týraly dáris oqydy. Memlekettiń áıelder quqyǵyn qorǵaý jolynda atqaryp jatqan is-tájirıbesimen tanystyrdy.
«Genderlik teńsizdiktiń saldarynan áıelderdiń quqyǵy shektelip keledi. Búginde álem boıynsha 63 mln qyz bala mektepke barmaıdy. Árbir úshinshi áıel fızıkalyq nemese jynystyq zorlyqtyń qurbanyna aınalady. Oǵan qosa kún saıyn jasy 18-ge tolmaǵan 47 myń boıjetken erkinen tys kúıeýge shyǵady», dedi mártebeli elshi óz baıandamasynda.
Onyń aıtýynsha, áıeldiń mindeti úıde otyryp, bala baǵý degen qaǵıdamen shvedter kelispeıtin kórinedi. Er azamattar men áıelderdiń quqyqtaryn teńestirý úshin «Shved ákesi» degen memlekettik baǵdarlama qabyldanypty. Otbasynda bala dúnıege kelse, dekrettik demalysqa ákesi de shyǵady. Bala kútimimen aınalysatyn ákelerge 3 aı boıy jalaqysynyń 80 paıyzy tólenedi. Shvesııa úkimeti áıelderdiń saıasattaǵy róli basymyraq bolýy tıis degen ustanymda. Sondaı-aq muragerlik, jerdi jeke menshikke alý, taǵy basqa máseleler boıynsha da názikjandylardyń quqyǵyn qorǵaýǵa úlken mán berilgen.
M.Qozybaev atyndaǵy SQMÝ rektorynyń mindetin atqarýshy Erbol Isaqaev oqý ordasyndaǵy ujymnyń 73 paıyzyn áıelder quraıtynyn jetkizdi. Basshylyqta 90 adam jumys istese, jartysynan kóbi – áıelder. Kadrlyq saıasatta genderlik teńdikti saqtaýdyń ózge de joldary áńgimelendi.
Shvesııa eli mundaı taǵylymdy leksııalardy tórtkúl dúnıede júıeli ótkizedi eken. Onyń ishinde Ońtústik Amerıka, Shyǵys Eýropa, Ortalyq Azııa men Afrıka basty nazarǵa alynǵan.
Soltústik Qazaqstan oblysy
